Atualità
Mussner: 210.000 euro ala Union Generela di Ladins dla Dolomites
L’atività dla Union Generela di Ladins dla Dolomites vën chëst ann sustenida cun 210.860 Euro dala man publica. Sëuraprò ie l assessëur Florian Mussner n tratatives per sustenì cun autri 12.000 euro l proiet dla zaita Gana, la njonta de la Usc di Ladins.
L’aministrazion publica valorisea l lëur dla Union Generela di Ladins dla Dolomites judan inant a livel finanzier. Per l ann 2010 dà la Provinzia de Bulsan 47.320 Euro per la Usc di ladins. Da pert dla Region Trentino-Südtirol iel unì prugramà 163.540 euro. Sun mpëni dl assessëur Mussner giapa la Union Generela chëst ann de ndut 210.860 Euro. Per la zaita Gana iesen tl lëur de mëter a jì mo autri 12.000 Euro.
Ntan i ultimi cin ani à la Provinzia y Region sustenì la Union Generela cun (n mesaria) 226.160 euro al ann. Scebën che l capituli dl bilanz provinziel ie dal ann passà unic smëndrì dl 9% ie l sustëni ala Union Generela me unì smendrì dl 6,7%.
L assessëur Florian Mussner stlarësc nsci la zifres di cuntribuc publics do che pra la “festa dl Popul Ladin” sun Ciastel Prösels ova l vizepresidënt dla Union Generela fat detlarazion n cont dl sustëni dla man publica.
usp
