Atualità
Mussner anconta delegazion dala Macedonia, Ladins ie n ejëmpl
USP – Co che la ie cun la defendura de mendranza tla Provinzia de Bulsan à l assessëur Florian Mussner ncuei, 5 utober prejentà a na delegazion dala Macedonia. N reprejentanza dl presidënt dla provinzia à Mussner metù a cuer la recunescënza dl status de mendranza, y che la mendranzes vën ududes sciche arichimënt. - Ladins sciche grupa de ejëmpl.
La Republica de Macedonia ie dal 1991 ndependënta. La majera grupa de rujeneda ie i macedonesc (64%), dan ai albanesc (25%) y i turcs (3,8%) deberieda cun d’autra mo mëndra grupes de rujeneda.
La delegazion dala Mazedonia à ulù audì da Mussner co che garata l prinzip dla reprejentanza giusta dla grupes de rujeneda tl Südtirol. L assessëur ladin à sotrissà la mpurtanza dl pruporz, sciche seva de nosc sistem y na garanzia che la grupes de rujeneda sibe nce reprejentedes tl’aministrazion publica.
Mussner à prejentà la situazion dla grupa de rujeneda ladina, auzan ora la scola paritetica y i prim vares de plurilinguism tla scolina. “I Ladins dëssa mantenì si mpëni per la cura dla rujeneda y cultura zënza se spartì dai autri” à dit l assessëur ladin. La va te nosc tëmps de cialé al’Europa y tlo iel debujën de auzé ora la grupa de rujeneda sciche na particularità de valor y nia tan de pëis al’esprescion de mendranza che vën suvënz ududa cun na conotazion negativa.
Tla Macedonia dëssel sun basa dl’acurdanza de Ohrid dl 2001 unì dat pëis al carater multietnich dla republica, realisan pruvedimënc per defënder la mendranzes y na reprejentanza rëidla dla grupes etniches. Per arjonjer chisc fins iel unì metù su l’urganisazion SIOFA che vën nce sustenida dala Union Europea. L barat danter mendranzes ie de gran mpurtanza, ajache n mpera un cun l auter, à dit Mussner.
as
