Atualità
Jonta provinziela dà pro la pruposta de bilanz 2011
USP – L’aministrazion de scola vën regulamenteda da nuef, l barat de puscions cun l Stat va inant, la regulamentazion per la uties da mont unirà fata da nuef: chisc ie stai i argumënc de majer nteres tratei ncuei (11 utober) dala Jonta provinziela tl cheder dla pruposta de bilanz 2011 che giapà l bënsté di assessëures.
L’ena passeda ova la Jonta provinziela scumencià a traté la lege finanziera per l ann 2011, ncuei iesen jic inant y à dat pro la pruposta che unirà pona purteda te Cunsëi provinziel. La norma de majera mpurtanza data pro te Jonta reverda l’aministrazion nueva dla scola. „La reforma dla scola auta pieta na bona ucajion per mëter duta trëi seves dla scola auta sota l medem ciapel aministratif“ à dit l presidënt Durnwalder do la senteda dla Jonta. Chësc uel di che duc i ciamps mantën si particulariteies, ma che l unirà fat n dipartimënt per scola y cultura che tol ite la ntendënzes, l istitut pedagogich (da 1. Jené 2011), la furmazion prufesciunela (dal prim de setëmber 2011), l Istitut per educazion musichela (dal prim de setëmber 2012). Dal mëter adum de chësta istituzions se aspieten plu efiziënza tl lëur, l nuzé de sinergies y a chësta maniera de sparanië custimënt de aministrazion.
Cun la pruposta de bilanz à i assessëures nce dat pro n passus che dà la puscibltà de slargë nce sun Polizia y Guardia di Finanza l barat de cuatieres sun puscions dla vedla casermes. „Nce te chësc cajo jirala nsci che la Provinzia cumëda la cëses y giapa lessù puscions dla casermes che ne vën nia plu adurvedes.
Fai de forma tla dumandes per cuntribuc provinziei ne dëssa nia plu purté a na estlujion automatica de cin ani. „Tl daunì ulons desferenzië danter fai de forma y fai de cuntenut“ à dit l Presidënt dla Provinzia. Nscì ne vën fai che reverda nia l giapé l cuntribut o la soma dl cuntribut, nia straufei tan dassënn.
Per la gestion dla 24 uties da mont che dai prim de jené 2011 dëssa passé dal CAI ala Provinzia, ne iel mo deguna regulamentazion nueva. „Ajache ne son nia boni de anjenië te puecia enes n sistem de gestion nuef, ons udù dant tla lege finanziera n articul che nes da la puscibltà de mené mo n ann la uties cun i medemi gestëures y la medema cundizions“ à spiegà Durnwalder.
Davia che la cumpetënza dl servisc de Judacrëp ie passa dal turism ala prutezion zevila, à la Jonta udù dant tla lege finanziera che i servijes dla lies da mont AVS y CAI vënie sustenì tres la Prutezion zevila.
Per dann ai pësc, che possa per ejëmpl suzeder a puzené lec artifiziei, dëssel unì njenià n fond gestì dal Ufize provinziel per la ciacia y l pië pësc. L fond giaterà scioldi da chëi che giapa na cunzescion per l’ega.
Per l prim de jené 2011 iel udù dant de tò ite na chëuta sun i cians. Plu avisa giapa i chemuns la puscibltà de tò ite nchin a 50 euro per cian.
La Provinzia sëurantulerà l custimënt per la cura de amalei psichics nce te strutures oradecà.
L Südtirol possa fé pea deberieda cun la regions dl nordest dla Talia la candidatura per la capitela europea dla cultura 2019. Chësta puscibltà ie ududa dant dala pruposta de lege finanziera. Per l ann che vën iel udù dant 600.000 euro per chësc fin.
as
