Atualità
Jonta provinziela: televijion per nfurmazion turistica
USP – La Jonta provinziela à ncuei (25 utober) fat ora i prinzipies dla televijion per nfurmazion turistica. Chësc canal nuef dëssa arjonjer i feter 5,5 milion de turisć che vën a passé la feries tla provinzia de Bulsan.
La televijion per nfurmazion turistica "Südtirol.info.tv" dëssa unì piteda te trëi rujenedes: tudësch, talian y nglëisc. Per la trasmiscion dëssel unì adurvà i canai sun tiera se nuzan dla njinies RAS che n à bele a desposizion. La Provinzia ne dëssa nia spënder ite plu de na milion de euro. Mira primera de chësc canal de televijion ie de fé al savëi la manifestazions y cie che l vën pità a livel culturel y de cuntreda. L cuntenut dëssa vester almanco 70% de carater nfurmatif, retlam puderà unì mustrà nchin a 30%.
Cun la ntroduzion dl sistem de trasmiscion digitel fovel unì resservà un canal per chësc servisc. L publich de referimënt ie i 5,5 milion de turisć tla provinzia de Bulsan che stà n mesaria 4-5 dis.
as
