Atualità
Jonta provinziela da pro la reforma tlinica
USP – “La reforma tlinica cumporta na ucajion da nia se lascé mucé” chësta paroles à l assessëur Richard Theiner abù per l dé pro dal reforma tlinica da pert dla Jonta provinziela. Permez ala pruposta prejenteda dan n mëns ne iel nia plu stat de gran mudazions, duc i set spedei unirà mantenì tl daunì.
Cun la dé pro dla Jonta provinziela possa muever la reforma tlinica. Chësc ie n mumënt de gran sudesfazion, tl’Europa iel truepa regions che uel tré tres na reforma tlinica, ma me pueces ie bones de ruvé a na cuntlujion” à detlarà l assessëur Theiner tla cunferënza stampa de ncuei, 8 nuvëmber. L assessëur deberieda cun l diretëur generel dl’azienda sanitera Andreas Fabi y l diretëur dla sanità Oswald Mayr à sorissà che la reforma ne se mustrerà nia da n di al auter, ma che l se trata de na pruzedura che adrova si tëmp, nce ani per l bën di pazienc y di zitadins. Te chësc mumënt iel unì ufizialisà i criteries fundamentei che mëina la reorganisazion dl ciamp dla sanità. L documënt dat pro dala Jonta provinziela ie majara pert l medemo sciche la pruposta prejenteda dan n mëns. La seves prinzipeles ie l’assistënza sun dut l raion, la spezialisazion tlinica cun cualità zertificheda a livel naziunel y l cuntenimënt dl custimënt nce sce l vën for damandà de plu servijes.
Degun di set spediei (Bulsan, Persenon, Sterzing, Burnech, San Ciana/Innichen, Maran y Schlanders) ne vën śarei. Danter i prim miuramënc saral aldò dl assessëur Theiner l smëndrì dla lista da aspité. De chësc vieres uniral scemplificà la prenutazions, dantaldut per la vijites do i ntervënc. Uni spedel mantenirà si servisc de basa y deventerà zënter de cumpetënza per n servisc provinziel. Cun la reforma uniral nce mantenì i 5 primariac. Per ntervënc particuleres sciche per ejëmpl l’oprazion de n tumor, puderan jì te n zënter spezialisà cun la njinies modernes y dutores de gran cualifica. Per la fasa danora y do l’oprazion puderan jì tl spedel plu daujin. “Me cun la spezialisazion pudons garantì servijes de cualità y tenì pea a livel naziunel y nternaziunel tl ciamp dla sanità” à dit Theiner.
Tl cheder dla reforma, nsci Durnwalder, uniral metù a jì zëntri de cumpetënza, nsci a Bulsan per ictus, a Persenon per la chirurgia plastica, a Burnech per la fecondazion artifiziela, a San Ciana/Innichen per la terapia dl mel, a Sterzing per la reabilitazion neurologica y a Schlanders per l’endoprotesi (ufs y jenodli).
as
