Atualità

Economia | 16.11.2010 | 13:42

Deberieda per valorisé l zënter de S.Cristina

USP – 41 pruvedimënc per miuré l cumerz tl zënter, miuré l atratività dl luech y la cualità de vita. Chisc ie i resultac dl studi per valorisé S.Cristina che ie (ncuei) ai 16 de nuvëmber unic prejentei a Bulsan dal assessëur Thomas Widmann, l diretëur dla repartizion cumerz Hansi Felder y l ambolt Eugen Hofer. I pruvedimënc ie resultac de na gran culaburazion danter Provinzia, Union per l cumerz HDS, Chemun, la unions cumerzieles y sozieles dl luech.

Do che a S.Cristina iel l ann passà unì giaurì la streda de zircunvalazion ie chësc n bon mumënt per se de da fé a miuré l atratività dl luech. L cunzet prejentà a Bulsan vëija dant vares per miuré l cumerz tla streda Drusan ulache l passa sën 70% manco auti. Danter i pruvedimënc plu mpurtanc, prejentei dal ambolt Eugen Hofer iel la ntreda zentrela muan dal rundel dla zircunvalazion. Cun l auto dëssen pudëi arjonjer l zënter al’autëza dl hotel Christallo, pona furné me plu o suvier o juvier y nia plu de reviers. Ntan la sajons turistiches vën la streda Dursan sëuraprò sareda defin da sëira. A chësta maniera unissel fat n prim var per realisé chël che la populazion se ova damandà te na nrescida fat chësta ann d’ansicuda: la limitazion dl muvimënt di auti tl zënter. Pont prinzipel de atrazion dëssa deventé l raion Mulin da Iman cun servijes de nfurmazion y skipass cun l fin de fé fermé la jënt y la avisé tl zënter. N ce tla streda Dursan nstëssa vala de nuzé locai uec, pité prudoc che mancia mo y pité lueges de ancunteda soziela y per i mëndri.

“L ubietif dla Jonta provinziela ie de dé vita ai zëntri di luesc. L studi cumpanià da esperc ie permò la prima fasa, sën se tratela che la jënt tën pea per la realisazion” à sorissà l assessëur Thomas Widmann. I 41 pruvedimënc ie resultat de n lëur de 8 mënsc che ova scumencià cun na nrescida ai zitadins, ntervistes a persones spezifiches y a respunsabli dl turism. “I bujëns da pont de ududa dla populazion y di turisć ie stai la basa dl studi” à dit Hansi Felder, diretëur dla repartizion per l cumerz.

Dut l studi ie unì cumpanià da esperc che à bele fat de tei lëures te d’autri luesc. “A S.Cristina iel unì laurà cun prufesciunalità y cun gran entusiasm” à detlarà l prufessëur Luciano Pilati dl’università de Trënt, juntan che “che l ie l miëur proiet di ultimi diesc ani”.
S.Cristina fova stata crissa ora danter 7 chemuns piloc per purvé la fazion de n tel studi de valorisazion dl zënter. L chemun de Gherdëina ie stat l prim a prejenté resultac.

La streda de zircunvalazion à tëut demez l muvimënt di auti danter la cëses, dal’autra pert vën su la tëma che i tlienc passa via. Werner Frick, diretëur dl HDS à detlarà che la valorisazion dl zënter possa me garaté sce l vën laurà te na rë de culaburazion. “Ajache l liam dla forzes ie la via dla realisazion”, nsci Frick.

I partner dl studi à sotscrì n’acurdanza cun l Chemun che i pruvedimënc vënie nce realisei aldò dla pusciblteies finanzieres y di tëmps de realisazion che n se à tëut dant.
--
I pruvedimënc unirà ncuei, 16 nuvëmber, prejentei plu apuntin te na reunion publica, dala 20.30 tl chemun de S.Cristina.

Galaria dales fotografies

Scotscì l’acurdanza sun i pruvedimënc per S.Cristina: l ambolt Hofer, l assessëur Widmann, l diretëur de repartizion Felder y l prufessëur Pilati. (foto USP/Pertl)