Atualità
Doi puenc nueves da Pruca ite, la streda gëura n vënderdi sëira
USP – Sun l stradon de Gherdëina da Pruca ite vëniel fat doi puenc nueves y slargià la streda. I lëures se à chisc dis damandà de saré defin la streda per l muvimënt di auti. N vënderdi sëira, 19 de nuvëmber vëniel inò giaurì la streda da Pruca ite.
Trëi chilometri dedite da Pruca, ulache pea ora la streda per Solaion fovel gran debujën de fé da nuef doi puenc y de slargë la streda. L puent plu daujin ala streda che pea da na pert ora, tl raion “Villnad” vën fat defin da nuef, chël che ie me puech plu injù possa unì slargià mantenian l medemo la vedla strutura.
L ie bele 10 ani che te na culaburazion danter Servisc provinziel per la stredes, Chemun de Laion y la Repartizion per nfrastrutures de stredes vëniel cialà de slargë i prim chilometri dla streda de Gherdëina da Pruca ite. Tl raion “Villnad” fovel bele dan doi-trëi ani unì zarà ju l vedl mulin y slargià la streda. “Davia che l puent fova tlo plu strënt dla streda cumededa, univel a se l de n pont de pericul a furné oravier” spiega l’assessëur Florian Mussner. Da na larghëza de 7,5 metri ruvoven sun l puent che fova me 5,7 metri de larghëza. La strutura dl puent, ruveda ti ani, fova śën da fé da nuef.
Sëuraprò ai doi puenc vën chisc dis nce slargià la streda, fajan la fundamënta dessotpert y pona l asfalt da nuef. Per duc chisc lëures à la Provinzia de Bulsan udù dant n nvestimënt de 350.000 euro. I lëures de esecuzion ie unic sëurandai ala firma Max Bölg cun sënta a Persenon che à pità de i fé per 201.111 euro. I lëures vën fai do l proiet dl ing. Giovanni Benussi.
Chëst’ ena iel unì fat da nuef i puenc y nsci fejen cont de pudëi n vënderdi sëira, 19 de nuvëmber, inò giaurì la streda. La fin de duc i lëures ie ududa dant per la fin dl mëns.
as
