Atualità
Criteries per frabiché la perjon nueva a Bulsan
USP – La Jonta provinziela de Bulsan à ncuei (22 nuvëmber) dat pro de plu criteries per nvië via l frabiché dla perjon nueva a Bulsan. L se trata dl prim proiet che dëssa unì finanzià tres l acurdanza de Milan, danter la Provinzia de Bulsan y l Guviern a Roma.
Aldò dl’acurdanza de Milan ti fej la Provinzia de Bulsan sparanië al Stat 100 milion de euro giapan lessù cumpetënzes nueves. Te chësta acurdanza iel danterauter nce udù dant che la Provinzia jude a finanzië frabiches de nteres provinziel y statel. “Al mumënt ne ie deguna frabica plu debujën che no la perjon nueva” à detlarà l presidënt Durnwalder te cunferënza stampa. Aldò dl presidënt ne respetea la cundizions de vita tla perjon da Bulsan nia la denità dla persona. La tëmp te perjon dëssa unì nuzà per se istruì inant y se anjenië a n autra maniera da vita. Te chësc mumënt iel 150 persones te na lerch ududa dant per 80 persones. Cundizions che ne lascia nia pro na reabilitazion dla persones śaredes via. Tl perjon nueva dëssel unì udù dant lerch per 200 nchin 250 persones.
I assessëures ie stai a una che la perjon nueva dëssa unì frabicheda y che l ie n proiet de prëscia. La luegia ududa dant ie ti raions dl aeorport de Bulsan. N cont de dé su i lëures dëssa l cumisser nciarià dal Guviern de Roma scrì ora n cuncors publich. Per cuestions de urbanistica y despuscion dëssa valëi la leges provinzieles. La Provinzia dëssa giapé la vedla perjon per pudëi fé cuatieres, strutures universiteres o auter.
Śën iel mpurtant che a Roma vëniel azetà chësc nvestimënt tl cheder dl’acurdanza de Milan. A chësta maniera pudëssel n auter ann unì scumencià a frabiché.
as
