Atualità

Trafich | 25.11.2010 | 16:47

No bever y furné: prejentà la campania nueva te trëi rujenedes

USP – “Sce n bev alcol ne dëssen nia furné cun l auto”. Chësc ie l pensier zentrel dla campania nueva de sensibilisazion per la segurëza sun streda. Ncuei domesdì (25 nuvëmber) à i assessëures Mussner, Widmann y Theiner deberieda cun l colegh dl Tirol Bernhard Tilg y reprejentanc dl Trentino prejentà l placat nuef che ie nce unì fat tla rujeneda ladina.

La campania de senisiblisazion de no furné sce n à bu alcol ie na prima culaburazion danter l Tirol y la provinzies de Bulsan y Trënt. L ie l resultat de na vijion che n ova abù te na senteda di trëi cunsëies provinziei deberieda. La campania “Don’t drink and drive” se stiza cun la gran esperienza dl Tirol che ie bele ruvà ala 13esima edizion. “Sce i placac de chësta azion sarà da udëi sun la basa lergia de duta trëi provinzies sarà nce i resultac boni aldò” à dit Florian Mussner pra la prejentazion sun l marcià da Nadel a Bulsan. Per l Tirol an lascià stampé 6.000 placac y per l Trentino 4.000. Tla Provinzia de Bulsan uelen sensibilisé la populazion cun 3.000 placac sparì sun trëi rujenedes. L slogan dla verscion ladina ie “A chël bëgn: Canche i bëri ne vai danz no cun l'auto“. “L fej plajëi che n à nce azetà de fé na produzion per ladin, chësc ie n sëni de sensibilità de vies de nosta grupa de rujeneda da pert dl Euregio. Perchël prei nce bel ai osć dla valedes ladines de tenì pea” à dit l assessëur ladin.

Tl ann 2008 iel unì cumpedà 70 desgrazies sun streda per via dl alcol. La Polizai à abinà 1.160 persones che avisova da ciocs y ti à pona nce tëut la patent. Nce sce n ne possa nia furné cun plu de 0,5 promille de alcol tl sanch, ova la persones che n à tenì su na mesaria de 1,5 promille. “Vares inant desmostra la cumpëida de desgrazies che ie smendrida de 37% permez al ann dant” à spiegà l assessëur Richard Theiner.

La campania de no avisé l auto do avëi bu alcol ie na azion sëuraprò a d’autres sciche per ejëmpl l’ublianza di montli da inviern. “Ne pertendon nia n’astinënza, iust dan Nadel dëssen nce pudëi se bever zeche, ma daldò possen nce furné a cësa cun i mesuns publics” à dit l assessëur Thomas Widmann.

La segurëza dla persones che ie sun streda ie l fin prinzipel de truep nvestimënc provinziei. Sëuraprò ai nvestimënc per frabiché y mantenì la stredes ie nce tel azions pedagogics n pruvedimënt cuncret per scunjeré desgrazies. “Cialan al daunì ulons nce fé velch per sensibilisé sun i periculi tl lëur da paur, ajache ultimamënter ons abù cumpëides de desgrazies da spavënt” à dit Mussner.

L placat “Don’t drink and drive” cun l slogan te una dla trëi rujenedes provinzieles vën tres na culaburazion cun la lia di osć partì ora a duta la ustaries dl Tirol y dla provinzies de Bulsan y Trënt. L’azion vën cureda dala Provinzia de Bulsan y dal’Agenzia provinziela per i Servijes Saniteres per la pert dl Südtirol.

La mpurtanza de chësta campania à pra la prejentazion nce sorissà l diretëur dl Kuratorium per la segurëza sun streda dl Tirol Norbert Balha, l presidënt dla lia di osć (HGV) Walter Meister, Marzio Maccani dirijënt dl Servisc Polizia Amministrativa de Trënt y Luciano Pontalti dl Servisc dl’ativiteies saniteres per Trënt.