Atualità
Jonta scrij ora n cuncors per la televijion turistica
USP – Cun l sistem nuef de trasmiscion televisiva digitela ova la Jonta Provinziela udù dant n canal de nfurmazion per i turisc' che fej feries tla provinzia de Bulsan. Davia che n ulëssa mustré de plu categuries de nfurmazion tl medemo mumënt vëniel scrit ora n cuncors per abiné na soluzion tecnica aldò.
L canal de nfurmazion turistica dëssa dé lerch a cater categuries de nfurmazion. N iede cie che l ie da udëi (per ejëmpl atrazions natureles) y cie che l vën pità n cont de vela culturela y ativiteies. Chësta sort de nfurmazion a livel provinziel y nce a livel de raion. Leprò vën mo la manifestazions y filmes che n à bele sun i prudoc da tlo y sun l raion n generel. La Jonta provinziela ulëssa mplu mo dé lerch per retlam a paiamënt.
“Duta chësta nfurmazions ne possa nia drë bën unì mustreda a rotazion, perchël chirons do na soluzion tecnica aldò” à spiegà l presidënt Luis Durnwalder tla cunferënza stampa do la senteda dla Jonta. Tres l cuncors che unirà scrit ora se aspieten che esperc debe resposta a chësc bujën de pité de plu categuries de nfurmazion tl medemo mumënt.
Te n ann ruvel feter 5,5 milion de turisć tl Südtirol. „Fajon dl dut per fé unì la jënt da nëus, ma canche i ie tlo ne sons nia boni de ti dé duta la nfurmazions sun l raion y si jënt, cultura, economia, nfrastrutures y manifestazions” à dit Durnwalder. La mira dl canal de furmazion ie de ti pité duta la nfurmazion diretamënter tla majon dl hotel.
as
