Atualità
Ladins anconta Bulsan tres cianties d’Avënt
“La jënt ladina anconta l’autra cultures a Bulsan tres cianties d’Avënt”: ucajion de na tel ancunteda pieta l Assessorat provinziel Ladin ai 10 de dezëmber cun n cunzert d’Avënt tl Dom de Bulsan. Sies cores y grupes ladines dajerà esprescion a si maniera de viver l’Avënt, tl cuntest dla cultura ladina.
L ie l prim iede che cores ladins se prejënta deberieda a Bulsan te n cunzert d’Avënt. Cun cianties de preparazion al Nadel se prejënta a chësta maniera nce na pert zentrela dla cultura ladina al publich de Bulsan, n publich de de plu cultures mescededes. “Te chësta enes semea che duminea l nteres cumerziel, cun chësc cunzert ulons mustré coche nëus ladins vivon l Avënt” spiega l assessëur Florian Mussner che à abù chësta scumenciadiva.
N vënderdi ai 10 de dezëmber saral da audì l Cuartet Göma, l’Urchestra Val Badia y l Cor Kérigma per la Val Badia. Da Gherdëina saral l Brass Quintett de Urtijëi, la grupa De Cater y l Cor Saslonch a purté dant si pec. L digan sn. Bernhard Holzer purterà vel pensier danora y Otto Dellago prejenterà la singula grupes.
Nteressei de duta la grupes de rujeneda ie nviei ai 10 de dezëmber dala 6 da sëira tl Dom de Bulsan.
as
