Atualità

Frabiché | 28.12.2010 | 17:25

Giaurida dla zircunvalazion de Ciastel Badia

USP – Cun na festa iel (ncuei) ai 28 de dezëmber unì giaurì ufizialmënter la zircunvalazion de Ciastel Badia deberieda cun i zitadins y reprejentanc dl chemun. L presidënt dla provinzia Durnwalder y l assessëur Mussner à sorissà che l ne fova nia plu da respuender che 18.000 mesuns passova uni di la vedla trassa periculëusa. La zircunvalazion respeteda dantaprima la cuntreda. Cun chësta zircunvalazion iel unì purtà inant l miuramënt dla streda de Puster – nsci à detlarà i aministradëures provinziei.

L presidënt Durnwalder à laudà la nfrastrutura sciche na nvestizion drët garateda per l daunì. Miuran i culegamënt tla valeda de Puster, tenian cont nce de curieres y ferata, possel unì schivà dificulteies economiches, per la stieres y per l turism, nsci l pensier dl presidënt dla Jonta provinziela. I mures dla vedla streda fova dassënn stlec, perchël fovel gran ëura de miuré la streda dan che fossa mo suzedù vel desgrazia. Per tò la dezijion de fé chësta zircunvalazion à la Jonta provinziela valutà la cunseguënzes sun natura y cuntreda, ma nce per l bën di zitadins. „On frabicà velch zënza desdrù velch“ à dit Luis Durnwalder. L miuré dla streda de Puster ti stà a cuer ai aministradëures provinziei. Nsci se an tëut dant de abiné soluzions aldò de nosc tëmps y de realisé i programs. Per l ann che vën iel udù dant la proietazion dla zircunvalazion de Vandoies Dessot. Per la ntreda tla Val Badia ne iel – aldò de Durnwalder – deguna miëur’ soluzion che chëla pra l Ciastel Badia.

N cont dl frabiché dla zircunvalazion à l assessëur Florian Mussner nunzià la bona culaburazion danter Provinzia y Chemun, ma dantaprima l unì ancontra di ujins. Ntan i lëures iel unì cialà do cun metodologies mpeniatives sce l giavé dl tunel ne fej nia dann al raion dessëura y nsci an mparà velch leprò à dit Mussner: „La plea de diesc zentimetri te n’opra d’ert tl Ciastel Badia ie unì metuda a post. Ne on nia frabicà na superstreda, sciche vel un ova festide, ma na streda che fova debujën per garantì plu segurëza a chëi che ie sun streda y plu cualità de vita chëi che vif tl raion de Ciastel Badia“ à sorissà Mussner.

Pra la festa de giaurida à Gustav Mischì, che à menà i lëures, cialà de reviers ai lëures cuntan dl gran mpëni per la mesurazions. Do che n ova arjont 30 metri de tunel a stlupeté l crëp, ova la Cripta trat sfëntes. Pona fovel unì jit inant giavan ora y purvan ora manieres de lëur nueves. Da uni ëura pudova i unijs cialé do sun internet i valores muserei da plu njinies. Adurvan mascins particuleres ie l custimënt, aldò de Mussner, ngrandì de 3,5 milion de euro. De ndut iel pona unì fat n nvestimënt de 26 milion de euro.

La zircunvalazion de Ciastel Badia mesura 1,6 chilometri. L ie cater toc: n prim toch de 70 metri, l tunel giavà ora de 310 metri, n toch de 125 metri nchin pra l Amtmannbühel y pona mo n tunel giavà ora de 105 metri sota l Amtmannbühel.