Atualità
Trëi Rëiesc anconta la Jonta provinziela: dunfierta per cooperazions tl mond
USP – Na vijita drët da plajëi à (NCUEI) ai 30 de dezëmber giapà la Jonta provinziela ntan si ultima senteda dl ann tl palaz Widmann a Bulsan. Mutans y mutons furnì su da Trëi Rëiesc à ciantà ai assessëures provinziei y à pià do na dunfierta per la persones che se n stà manco bën. Chëst ann vëniel judà te na maniera particulera a doi proiec de cooperazion nternaziunela tl Brasil.
Nce chëst ann iel feter 6.000 mutans y mutons te duta la pluanies che danter Nadel y Santa Guania va da cësa a cësa per cunedì la nascita de Gejù y abiné adum dunfiertes per n bon fin. La scumenciadiva dla Katholische Jungschar/Schira Jonila juda a finanziei passa 100 proiec de cooperazion per judé mëndri manco fertunei de dut l mond. L ann passà fovel unì abinà adum 1,3 milion de euro.
Ntan la senteda dla Jonta provinziela iel unì na grupa dla pluania dl Dom de Bulsan. Al mbincé n bon ann 2011 da pert di Trëi Rëiesc cun crëida y ncëns, à l presidënt Durnwalder y i assessëures respundù rengrazian la mutans y i mutons per si mpëni, cun n liber y cun na bela dunfierta.
Cun chël che l’azion di Trëi Rëiesc abina adum vëniel judà a miuré la situazion de vita per milesc de mëndri. Chëst ann vëniel dat n majer aiut a doi proiec tl Brasil. L unirà finanzià strutures y cursc de furmazion per paures a Minas Gerais cun la mira de ti tenì permez al mucé dala campanies. Tl raion dl Rio Madeira tl stat dla Rondonia, ulache lëura l miscioner combonian Robert Sottara dla Val Badia, uniral judà a purté l strom y garantì l’ega da bever.
as
