Atualità
L vën inò azetà dumandes per sustëni turistich
USP – Strutures che dà albierch te raions valutei turisticamënter sciche “puech svilupei” possa tl 2011 inò damandé n sustëni provinziel. La Jonta provinziela à (ncuei) ai 30 de dezëmber fat ora de lascé pro n pert dumandes per sustëni turistich. L sustëni dëssa dantaprima judé raions che manacia de nia se la cavé.
L ann passà fovel unì fermà la dumandes per sustëni turistich da pert dla Provinzia de Bulsan. La mudazion che ie śën unida fata a chësc regulamënt reverda nce criteires per la dumandes y i cuntroi che ie unic adatei al ciamp dl cumerz, artejanat y ndustria. Dal prim de jené possa hotiei, pensions y n generel la strutures che pieta albierch, te raions turisticamënter puech svilupei, damandé n cuntribut provinziel. Aldò dl nvestimënt privat iel udù dant cuntribuc dl 13% nchin al 20% o de n mprëst de 2,5 milion de euro ora dl fond de rotazion, sce la strutura à n volum de afares sot a 500.000 euro.
Te luesc ulache l ie me plu una atività turistica per sort y l manacia nsci de jì perdù l servisc, possel unì dat n cuntribut nchin a 40% dla nvestizion. “Sce te n luech stluj per ejëmpl l’ultima ustaria, iel nce n pericul per la cualità de vita” à juntà l presidënt Durnwalder tla cunferënza stampa do la senteda dla Jonta.
as
