Atualità
Frabiché a livel dla “Cësa Tlima B”
USP – Cun l fin de smendrì l cunsum de energia à la Jonta provinziela (ncuei) ai 30 de dezëmber udù dant che la cëses che vën frabichedes da nuef possa me plu adurvé 5 litri de gasuele per meter cuadrat y respeté nscila l standard de “Cësa Tlima B”. Per l ressanamënt energetich de vedla cëses ne iel nia unì fat mudazions.
A frabiché cëses nueves fovel nchinamò pertendù l livel de cunsum energetich “Cësa Tlima C”. Per l ann nuef ie chësc livel unì auzà ala categuria “Cësa Tlima B”, che uel di che mpede n cunsum de 7 litri per meter cuadrat, muessel unì frabicà a na maniera da adurvé me plu 5 litri per meter cuadrat.
Sce l vën frabicà da nuef tenian ite n standard mo plu aut, dà la Provinzia n bonus de 5% de cubatura sëuraprò. Davia che tl 2011 muessel unì arjont l livel “B”, vën chësc bonus me plu dant sce l vën frabicà a na maniera da arjonjer l livel “A”.
Per ressanamënc de vedla cëses ne iel nia unì fat mudazions. Tlo dà la Provinzia nce tl 2011 n bonus de cubatura de 200 metri cubich sce l vën arjont l livel de “Cësa Tlima C”.
“Per l ann 2015 se ons tëut dant de damandé l livel “A” per la cëses che vën frabichedes da nuef. Chëstes adrova me 3 litri de gasuele per meter cuadrat” à dit l presidënt Durnwalder, juntan che la Union Europeica à udù dant che uni region smëndres l cunsum de energia nchin dl 2015 a na maniera de arjonjer na situazion autarichica y vester boni dl curì l cunsum cun la produzion fata nstës.
as
