Atualità
Criteries per cuatieres a zitadins nia europees
USP – I criteries de sustëni provinziel per cuatieres soziei a zitadins nia europees ie unic adatei. La Jonta provinziela à te si senteda (da ncuei) ai 17 de jené dat pro de adaté la formula dl cont a na maniera de adurvé i medemi criteries sciche per la jënt da tlo, ma mantenian la doi graduatories spartides.
I assessëures provinziei ie stai a una de adaté la norma n cont de cuatieres soziei IPES (Istitut per l’edilizia soziela) a zitadins nia comuniteres. Chësta mudazion ie stata debujën do na sentënza dla suneria de lëur che ova detlarà la regulamentazion da dant descriminënta. La Jonta provinziela à śën stlarì la cuestion tenian cont de no ulëi fé paië lessù chëi da tlo, de no ulëi sustëni l auzé di priejes de fit y de no ulëi spënder de plu che ne ie mesun tres l bilanz provinziel. L unirà mantenì la doi graduatories spartides, mudan la formula de cont che vën fat aldò dla perzentuela de zitadins y la cumpëida de dumandes.
La zifres di zitadins nia comuniteres ie: 5,26% dla populazion dl Südtirol y 27,09% dla dumandes azetedes (cun amanca 25 ponc). Aldò dla formula nueva (coefizient 3 mpede 4 n cont dla perzentuela dla populazion) vëniel ora n mesaria n valor de 10,72% mpede 8,9%. A chësta maniera fej l’aministrazion provinziela cont de avëi adatà l regulamënt a na maniera che l possa nce jì bën per la suneria.
as
