Atualità
Mierculdi ai 26: nfurmazion sun la reforma dla scola auta tla Val Badia
USP – Do la prima doi ancuntedes de nfurmazion sun mudazions y nuviteies dla reforma dla scoles autes te Gherdëina, uniral n mierculdi ai 26 de jené jit inant tla Val Badia. Genitores, sculeies y duc nteressei ie nviei domesdì a La Ila y da sëira a S. Martin de Tor.
Cun la reforma dla scola auta, à la Jonta provinziela urganisà da nuef la vela de furmazion per i jëuni danter 14 y 19 ani. Cie che se muda cuncretamënter tla scoles autes ladines, cie che l unirà pità da nuef, ciunes che ie la pusciblteies de furmazion y cie che l proscimo ann de scola purterà a livel pedagogich y de cuntenut, uniral prejentà te ancuntedes cun duc i nteressei. La nfurmazions de prima man ie dantaprima pensedes per i sculeies che fina la scola mesana y si genitores.
Cun cater manifestazions pieta la Ntendënza nfurmazion de persona. La prima doves ie bele unides tenides te Sëlva y a Urtijëi. Tla Val Badia unirà la manifestazions de nfurmazion tenides n mierculdi, ai 26 de jené dala 15.00 tla scola mesana de La Ila y pona dala 20.00 tl salf di Studafüch de S.Martin de Tor.
Te chësta ancuntedes de nfurmazion tenirà l ntendënt Roland Verra na ntroduzion. Deberieda cun l’ispetëura Rosmarie Crazzolara prejenteral pona la nuviteies per la scoles autes ladines. Nfurmazions spezifiches sun la scoles autes ti luesc ladins prejenterà nce i diretëures dla scoles autes.
Mplu iel nce da pudëi liejer do nfurmazions sun la reforma dla scola auta sun la plata internet www.reformadlascola.bz.it che ie nce unida anjenieda tla rujeneda ladina.
as
