Atualità
Auguresc a Kostner per l arjënt da Durnwalder
USP – Per si prestazion straurdinera y per vester na persunalità de referimënt per dut l Südtirol, à l presidënt dla Provinzia Luis Durnwalder fat i auguresc a Carolina Kostner, vizecampiunëssa de Europa de jadiné artistich. “Kostner y i autri atlec che à venciù bedaies ntan l fin dl’ena desmostra tan inant che n possa ruvé tl sport sce n tën permez y à na tel mentalità da ejëmpl” à dit l presidënt dla provinzia.
Pra i campiunac d’Europa de jadiné a Bern à Carolina Kostner arjont l segondo plazamënt te na garejeda plëina de emozion, restan me do la svizra Sarah Meier. Danora fova Kostner unida valuteda sciche favorita per si bon scumenciamënt de sajon y per l titul arjont l ann passà. Tla prima mance iela tumeda doi iedesc y la speranzes per na bedaia fova dastrap pitles. Che la jëuna de Urtijëi ie pona tla pert finela mpomo stat bona de se purté inant à sorissà mo de plu si gran cualiteies sportives.
L presidënt Durnwalder à fat i auguresc per la bedaia de arjënt: “L’arjonta de Carolina nes fej a duc gran unëur, si eleganza tl jadiné a tucà i cueres di fans de dut l mond. Nce sce pra i juesc olimpics ne ti ala nia butà, ne l ala nia data su. La bedaia de arjënt a Berna desmostra tlermënter che ne dëssa nia de su la speranza y che cun lezitënza y crëta te sé nstësc ruven al resultat.”
Ntan l fin dl’ena iel unì arjont na lingia de resultac de marueia. Armin Zöggeler à venciù la bedaia d’or y dl duo Oberstolz y Gruber l arjënt di campiunac dl mond de tl sluse sun pista. Pra i campiunac ce de slusé sun purtoi naturel à Renate Gietl venciù l arjënt y Partick Pigneter l bront. Tla garejeda de doi ie Pignerter deberieda cun Forian Clara da Longiarü, deventà vizecampion dl mond. I auguresc da pert dl Presidënt Drunwalder ti và a duc chisc atlec, “che ie de ejëmpl per nosc jëuni”.
as
