Atualità
Trasport publich te dut Südtirol cun un n abunamënt
USP – La Jonta provinziela à tei si senteda dl 31 de jené (ncuei) scumencià a traté n sistem nuef de abunamënt al trasport publich. N ulëssa pité n sëul abunamënt che vel per dut l raion provinziel a na maniera che sëuraprò al viac che n fej plu suvënz, possel nce unì adruvà per vel viac te n auter raion. I priejes che ne fova nia plu unic tuchei per 15 ani muessa unì auzei. L sistem nuef premia chiche fej plu chilometri cun l servisc publich.
Tl daunì ne uniral nia plu pità abunamënc de trasport publich per viages singuli, ma n sëul abunamënt per duta la linies provinzieles. L abunamënt nuef dëssa valëi per dut l trasport publich che vën finanzià o sustenì dala Provinzia. “Minà iel tlo nce l skibus o la furadoies che fej pert dla servisc de trasport publich” à dit l presidënt dla provinzia tla cunferënza stampa do la senteda dla Jonta.
Cun la forma nueva de abunamënt dëssa nce tumé demez l messei dé ite n còdesc per la destinazion dl viac. La pruposta dl assessëur Widmann vëij dant n sistem da paredlé al skipass.
I priejes muessa unì auzei. “Na diretiva europea vëija dant che 35% dl custimënt dëssa unì curì cun la chertes. Tla provinzia de Bulsan iel nchinamò me stat mesun curì l 16-17%. Aldò dla previjions ruvons cun i abunamënc nueves nia cis l 30%” à dit Durnwalder.
I priejes plu avisa y la opzions muessa mo unì fai ora plu avisa. La cheres per sculeies y seniores dëssa resté. Ntan iesen stai a una che chiche fej truep viages, sciche i pendolares dëssa unì premiei. Da paië saral nchin an mascim de 20.000 chilometri al ann. I viages sëuraprò sarà debant.
Tla proscima senteda dla Jonta provinziela uniral rujenà inant di abunamënc nueves de trasport publich.
as
