Atualità
Jonta provinziela tol cumià da Alcide Berloffa
USP – Duta la Jonta provinziela deberieda à ncuei (28 fauré) tëut cumià da Alcide Berloffa, udù sciche l pere de rujeneda taliana per l “pachet de autonomia”. L defont ie fat su tla chëurt dl Palaz Widmann a Bulsan ulache l resta nchin duman merdi da mesdì.
Ncuei, lunesc danmesdì iel la chëurt dl Palaz Widmann unida giaurida per duc i zitadins che ulëssa tò cumià y tré l’ega santa a Alcide Berloffa. I prims ie stai i assessëures dla Jonta provinziela, che à fermà si senteda per tò cumià da una dla persones zentreles de rujeneda taliana che stata bona de purté inant l’autonomia dla Provinzia de Bulsan y per purté l cunduel a chëi de familia.
Alcide Berloffa fova dl 1948 deventà cunselier dl chemun de Bulsan y dl 1953 deputat dl Parlamënt talian ulache l ie unì lità per cater legislatures. Ël à cumpanià i tëmps dl tratat de Paris danter la Talia y l’Austria. Plu tert pona nce l’arjonta di statuc de autonomia per la provinzia de Bulsan. Dal 1977 al 1994 ie Berloffa stat cunselier de Stat y nciarià dal Cunsëi di ministri per cuestions dla provinzia de Bulsan. Berloffa ie mort ai 25 de jené 2011 tl età de 88 ani.
L fé su dl defont tla cësa provinziela nr. 1, la forestela che fej da verdia de unëur y la bandieres trates ju nchin amez, ie n sëni cun chël che la Jonta provinziela uel uneré i meric de Berloffa. Per deplù dejeneies ie Berloffa stat un di cunsiadëures de Bulsan plu mpurtanc per l Guviern talian y à perchël abù meric che l ie unì abinà na streda dl balanz y dl cunviver. Chësta arjonta vën nce simbuliseda da na pitla scultura zipleda da n scultëur de Gherdëina, dlongia l liber de cunduel, che reprejentea la trëi grupes de rujeneda che se à dla man.
Dlongia l vascel iel nce n crist zënza braces, che vën dal ufize de Berloffa, danejà da n atentat do che fova unì finà via l pachetl.
L defont resta fat su tl Palaz Widmann nchin duman, merdi dala 12.00, acioche uni un posse tò cumià.
as
