Atualità
26 milion per inuvazion y tueda
USP – Te si senteda (da ncuei) dl 28 de fauré à la Jonta dat pro n nvestimënt de 19 milion de euro per proiec de inuvazion y tueda. Sëuaprò iel nce unì dat l bënsté per 4,5 milion per l proiec dl zënter de inuvazion TIS y l program de cin ani.
Cun 19 milion à i assessëures provinziei chëst ann udù dant doi milion de euro de plu permez al ann passà, che possa unì nuzei per de plu proiec de inuvazion. “Per proiec che l zënter TIS fej nstësc, ons dat pro 4,5 milion de euro” à dit l presidënt dla provinzia tla cunferënza stampa do la senteda dla Jonta. Cumpedan pea i finanziamënc che fova bel unic dai pro per d’autri istituc de tueda sciche l istitut Fraunhofer y IIT, fejel ora na soma de 26,3 milion che vën chëst ann spendui ite tl’inuvazion y tueda.
Argumënt dla Jonta provinziela ie nce stat l parch tecnologich a Bulsan Sud, dajan pro l ressanamënt de cëses per purté inant chësc parch. “L program di cin ani vëija dant 2,5 milion de euro per chëst ann, 10 milion per l 2012, 16 milion per l 2013, 16 milion per l 2014 y 18 milion per l 2018 per realisé l parch tecnologich” à dit Durnwalder. L ie udù dant de anjenië tan de lech sciche vën nce adurveda. „Nchin a śën iel bele unides ite 13 dumandes de firmes tecnologiches de livel aut“ à dit l presidënt dla Jonta.
as
