Atualità
Jonta provinziela uel riesc purté inant l proiet dla stazion a Bulsan
USP - Pra la stazion dla ferata a Bulsan possel unì a se l dé na bela pert nueva dl zënter dla zità. L ie na ucajion da nia se lascé mucé, perchël à Durnwalder detlarà de ulëi riesc purté inant l proiet de ressanamënt.
Tla cunferënza stampa do la senteda dla Jonta provinziela (ncuei) ai 28 de fauré à l presidënt dla Provinzia valutà l’idea che à venciù l cuncors sciche bona y nce realisticamënter mesun da realisé. L’acurdanza cun la sozietà dla ferata RFI vëija dant che l vënie fat da nuef la strutures per la ferata, curieres y ufizies. La Provinzia fej cont che l ie mesun mpartì chësta strutures a na maniera che l avanza mo feter 30 hectar y chësta lerch pudëssa unì nuzeda per fé velch d’auter te drët na bona posizion zentrela.
I proscimi vares udui dant dla Jonta provinziela ie śën da lascé valuté l custimënt, de anjenië la cundizions urbanistics per la lerch che dëssa avanzé y pona de scrì ora n cuncors per la realisazion. “L idea fossa che nteressei frabica la strutures per la stazion dla ferata y lessù giati la puscion de feter 30 hectar” à spiegà Durnwalder. Dessegur deventeral n gran cantier, ma dal’autra pert, nsci l presidënt, possel unì fat na bela pert dl zënter, che va dala stazion nchin a plaza Verdi y dal’autra pert nchin pra la furnadoia dl Renon. Per la zità de Bulsan iel na ucajion da nia se lascé mucé, perchël vala śën de purté inant la proietazion: nsci la vijion dla Jonta provinziela.
as
