Atualità
Prim bilanz sun l smendrì dla populazion ti luesc
USP – La cuestion di zitadins che se n va dai pitli luesc per jì a viver te zità ie stata n majer argumënt dla senteda dla Jonta provinziela dl 21 de merz (NCUEI). Aldò de n studi dl Astat y analises dl ufize de cumpetënza, an tratà la situazion atuela, prinzipeies y periculi. Tla proscima enes dëssel unì analisà la singula situazions ti luesc.
La gaujes per l smendrì dla populazion possa vester defrëntes. Te vel caji iel n problem de pusciblteies economiches, te d’autri de cualità de vita o de nia giapé da lëur. La nrescides che ie unides fates dëssa, aldò dl presidënt dla provinzia, unì slargëdes ora sun i raions per avëi nce n cheder generel.
“Nce sce te chësc mumënt ne ie la situazion nia tan grieva, iel mpurtant se dé da fé danora y nia permò canche l ie tert” à dit Durnwalder te cunferënza stampa. La cumiscion cun i doi nciariei Helmuth Pingera y Christoph Gufler dëssa tò su cuntat cun i chemuns per lauré ora soluzions adatedes ala situazion.
Da pert provinziela cialeran do plu avisa la situazion dla strutures, sciche per ejëmpl l internet slune y nce pruvedimënc singuli per judé n cont de cuatieres y ala firmes. Ti proscimi mënsc dëssa la cumiscion lauré inant y pona inò prejenté n bilanz ala Jonta provinziela. L dëssa unì laurà ora strategies deberieda cun chemuns y Comuniteis de raion che possa n cajo mo unides juntedes tl plan provinziel urbanistich y de svilup (Landesentwicklungs- und -raumordnungsplan LEROP). “On pensà a na regulamentazion urbanistich che fej ezezion per i raions tuchei, scemplifiché l sistem dla lizënzes, lueges per firmes y a nfrastrutures” à dit Durnwalder.
as
