Atualità
Zënter cumerziel a Bulsan: esperc per la streda Galilei
L zënter cumerziel per l Südtirol dëssa unì fat a Bulsan tla streda Galilei. Chësta ie la pruposta dla cumiscion de esperc che à studià l cajo sun ncëria dla Jonta provinziela. La luegia tla streda Galilei ie aldò di esperc la plu adateda per via de si posizion y ajache la ie saurida da arjonjer. N lunesc unirà l studi prejentà ala Jonta provinziela.
Tla cumiscion de esperc à da utober laurà l architet de Dispruch Dieter Leschninger, l espert de economia dl’università de Trënt Luciano Pilati, l espert de urbanistica y architet Pierguido Morello de Bulsan y l espert de muvimënt sun streda Willi Hüsler de Zurich/Zürich. Chësta cumiscion à (n sëira) n mierculdi, 23 de merz, prejentà i resultac de si lëur ai assessëures Michl Laimer, Thomas Widmann y Roberto Bizzo cun nce reprejentanc dla zità de Bulsan cun l ambolt Luigi Spagnolli, Klaus Ladinser y Chiara Pasquali.
„Bele tla lege urbanistica ons dat dant diretives tleres: l unirà fat n sëul zënter cumerziel tla provinzia y chël a Bulsan” à dit l assessëur Laimer. „Cun l zënter cumerziel ulons curì na locia tla vela y tl medemo mumënt ons nce metù na limitazion de 20.000 metri cuadrac per la butëiga. A chësta maniera ne vën l balanz danter pitla butëighes – mesanes y grandes, nia metù te pericul” ova l assessëur Widmann bele cunedì ti ultimi dis.
La cumiscion fova unida nciarieda de valuté la lueges da crì ora y de fé prupostes de culegamënc cun la strutures che ie bele, cun leprò de analisé la cunseguënzes sun la strutura de cumerz che ie bele a Bulsan y ntëurvia. Da pert dl ambolt de Bulsan ie unì sorissà l bujën de lascé pro l svilup dl cumerz y dal’autra pert de abiné na soluzion per n zënter cumerziel che passenea tl svilup dla zità.
I esperc à analisà 8 lueges a Bulsan: l raion ulache fova l “col-Pasquali”, l raion ntëur ala butëiga dl’Aspiag a Bulsan Sud, la strutures “Centrum” y “Twenty” che ie bele, l raion dla vedla sënta dla camera de cumerz cun la stazion dla curieres, l raion dla stazion dla ferata che unirà fat da nuef, l raion pra l Lagerhaus ti plans de Bulsan y l raion ulache ulache ie l garasc Mayer-Nusser. Duta chësta lueges ie unides analisedes n cont de dispunibltà, tan bën che les ie da arjonjer y la cunseguënzes che n zënter cumerziel te chëla luegia purtëssa da pont de ududa soziel y economich. De dut an laurà cun feter 14 indicatores per paredlé la lueges.
L resultat dla cumiscion ie unì arjont cun duc a una per la strutura cumerziela “Twenty” tla streda Galilei. Aldò di esperc se adatea chësta luegia dantaldut per si posizion daujin al zënter. “Cun zënter ne minons nia l zënter storich, ma l pont plu zentrel aldò de ulà che abitea la populazion“ à spiegà l pruf. Pilati. Plu daujin che l zënter cumerziel vën fat a si tlientela, manco dificulteies che l ie a ti ruvé permez. La stredes da ti ruvé permez ie bele davia che la luegia ie propi sun una dla vies prinzipeles de ruvé ite y ora de zità. Cun n culegamënt ala streda dala rodes y da jì a pe (cun puent sëura l Isarch), pudëssen arjonjer l zënter cumerziel nce drët saurì a pe y cun la roda.
Per la luegia crissa ora ie nce la butëiga “Twenty” che ie bele. A chësta maniera ne muessel nia unì fat duc i 20.000 metri cuadrac da nuef, ma me i 10.000 che mancia mo. Chësc ti va nce a bën dla strutures cumerzieles de Bulsan che ie bele. A chësc pont de ududa à nce la zentralità n gran valor, ajache n zënter cumerziel nzaul ora de zità ti tulëssa potenzial ala strutures cumerzieles che ie bele. Per la luegia “Twenty” rejona nce la puscibltà de ngrandì de viers de sud y la lueges dai auti che ie bele.
Do la prejentazion da pert dla cumiscion de esperc, vën chësc argumënt metù sun l orden dl di dla senteda dla Jonta provinziela de n lunesc. I assessëures Laimer, Widmann y Bizzo prejenterà l studi dan che l vën pona fat l proscimo var, che sarà la ntegrazion tl plann urbanistich chemunel.
as
