Atualità
Finanziamënt per scoles ladines
USP - Danter i 15 proiec che ie l’ena passeda unic tëuc su da nuef tl program per frabiché scoles iel nce lëures che unirà fai tla valedes ladines. De ndut à la cumiscion per frabiché scoles dat pro n finanziamënt per 17,7 milion de euro.
Danter i lëures che ie unic valutei de prëscia iel nce l ngrandimënt dla scolina a Antermoia. Chësc lëur per n custimënt udù danora de 90.000 euro dëssa unì tëut su tl program prinzipel di lëures.
Danter i 9 lëures che ie te chësc mumënt mo zënza finanziamënt iel nce l ressanamënt dla scola elementera de S.Lenert de Badia. Per 14 d’autri proiec iel alincontra unì segurà n finanziamënt de 17,7 milion de euro. N cont dla valedes ladines iel danter chisc lëures nce l ressanamënt dla vedla scola elementera a Urtijëi cun la Scola de Mujiga che giapa n finanziament de na milion y mesa de euro. Danter i lëures de mëndra mesura iel nce l ngrandimënt da scola mesana a S. Martin de Tor.
La cumiscion provinziela per frabiché scoles ie metuda adum da reprejentanc dla Ntendënza, la repartizion per frabiches y aministrazions locales cun a cë l presidënt dla provinzia Durnwalder. L duvier dla cumiscion ie de analisé i proiec y de i tò su tl program per la frabiches de scola per seguré l finanziamënt o sustëni tres l bilanz provinziel.
as
