Atualità
Jonta provinziela porta inant l zënter cumerziel
USP – La pruposta dla cumiscion de esperc n cont dla posizion dl zënter cumerziel a Bulsan ie unida azeteda dala Jonta provinziela che à nce fat i prim vares per ntegré l zënter tl plann urbanistich. I esperc ova valutà la strutura “Twenty” che ie bele tla streda Galiei, sciche la miëur luegia. – Limitazions per majera butëighes nce ti mëndri luesc.
Bele tla lege urbanistica provinziela fovel udù dant che l zënter cumerziel dëssa unì studià avisa. La cumiscion de esperc che fova unida numineda de utober à l’ena passeda prejentà si pruposta. Chësta soluzion ie (NCUEI) ai 28 de merz unida prejenteda da duta la Jonta provinziela.
Danora se oven damanda na pruposta per n sëul zënter cumerziel a Bulsan cun na spersa de 20.000 metri cuadrac. I esperc à n iede laurà ora 13 criteries aldò de chëi che l ie pona unì valutà la 8 lueges da crì ora. L resultat dla grupa de esperc ie stat la pruposta dla butëiga “Twenty” che ie bele tla streda Galilei. Aldò di esperc ie l “Twenty” plu adatà per si bona posizion zentrela ai raions ulache vif al populazion. “Na segonda rejon per chësta luegia ie che l ne muessa nia unì fat 20.000 metri cuadrac da nuef, ma che l muessa me plu unì juntà 10.000 metri cuadrac a chëi che ie bele” à dit Durnwalder do la senteda dla Jonta.
Coche udù dant per lege, à te chësc cajo la Jonta provinziela pudù nvië via la preparazion acioche l zënter cumerziel nuef vënie purtà ite tl plann urbanistich chemunel. Chësc vën fat a una cun l’aministrazion chemunela.
Acioche chësc zënter reste nce l sëul zënter cumerziel tla provinzia, à la Jonta provinziela tratà vel pruposta dl’assoziazion di buteghieres. Na cassa unica possa me unì fata per al plu doi butëighes dl medemo patron. Danter una strutura cun 2.000 metri cuadrac de butëiga y la proscima muessel vester almanco un chilometer. “A chësta maniera ulons astilé ora che de plu butëighes singules vënie metudes adum te un n zënter cumerziel” à dit l presidënt dla provinzia.
as
