Atualità
Regions tol su muciadives ma nia imigrei zënza lizënza
USP – Imigrei che ne respetea nia la lege resta de cumpetënza dl Minister dl intern, ma muciadives unirà nce tëuc su dala regions. Sun chësta posizion ie (N SËIRA) ai 30 de merz ruvei a una i reprejentanc dla regions talianes. I muciadives dëssa unì tëuc su n relazion ala cumpëida dla populazion, nsci iesen ruvei a una danter l Stat y la regions. L Südtirol ie te chësta tratatives unì reprejentà dal vizepresidënt Hans Berger.
For inò ruva truep imigrei dal Nordafrica sun la costes dla Talia y dantaldut sun l’ijula de Lampedusa. Per ti vester a chësta situazion de emergënza à l minister dla regions Raffaele Fitto y l minister dl intern Roberto Maroni tratà trëi ëura cun la regions. Argumënt zentrel ie stat l desferenzië danter imigrei zënza lizënza y muciadives.
“L minister dl intern rejona de 22.000 persones, ma n fej cont che me l 10% ie veramënter muciadives” à dit l vizepresidënt Berger do l’ancunteda. La majera pert dla persones che ie ruvedes sun la costes talianes resta a chësta maniera de cumpetënzes dl Minister dl intern. L ne ie mo nia tler co che n se anjenierà ite fé la identificazions y n cajo nce per mandé de reviers chisc imigrei.
“Me é parà dassënn contra la pruposta dl Guviern talian, de fé chisc zëntri te duta la regions y é nce giapà l sustëni dal’autra regions” conta Berger. Unit ora iel che i imigrei contra la lege ne unirà nia spartì su sun duta la regions, ma che l Minister chirerà do lueges adatedes. “Südtirol ne vën te chësc mumënt nia tëut n cunsciderazion per la cuestion di imigrei” à dit Berger.
Autramënter iela per i muciadives. Te chësc mumënt vëniel sciazà che l nen sibe 2200. Chisc dëssa unì spartì su danter la regions n relazion ala cumpëida dla populazion. “Aldò de chësta spartizion ruvëssa nia cis cincanta persones tl Südtirol” dij l vizepresidënt dla provinzia.
La dezijions de pruvedimënc ntan i proscimi dis unirà tëutes dala Prutezion zevila de stat. Ntant prova l Guviern talian a saré la onda de muciadives per ne ruvé nia sun la zifra de 55.000 che fova unida pronosticheda. “N spera dantaldut sun l’acurdanza cun la Tunisia che se à tëut su de cuntrolé si costes y n de lascé ite imigrei che ie vën mandei de reviers” dij Berger.as
