Atualità
Dal 13 de juni me plu frabiché cëses tlima B
USP – L plann per stravardé l tlima vën cuncretisà n var al iede dala Jonta provinziela. Dal 13 de juni jirà n drova la regulamentazion nueva n cont de adurvé energia per frabiché cëses. “Da mez juni ne vel nia plu l standard plu bas de cësa tlima C, ma chël de cësa tlima B”, dij l assessëur Michl Laimer. L ie mpurtant che i patrons de sebe per tëmp de chësta nuvità.
Dan feter trëi enes, ai 15 de merz ie tla gazëta ufiziela dla region unì publicà l decret che auza l livel plu bas scrit dant per cuatieres, butëighes, servijes y gastronomia n cont dl cunsum de energia. Chësta categuries possa dal 13 de juni 2011 me plu frabiché tenian ite chësc livel de cësa tlima. Autramënter iel per frabicac da paur, ndustria, majer cumerz o per artejans. “Cësa tlima B uel di che te n ann adroven nchin a 50 kilowatt al’ëura o dit autramënter, 5 litri de gasuele per meter cuadrat” spiega Laimer.
L livel plu aut per cëses nueves ie bele udù dant tl plann per stravardé l tlima dla Jonta provinziela. “Jon inant sun la streda dl sparanië energia y de stravardé l tlima ajache savon nce che frabiché do l standard cësa tlima B ne ie aldidancuei plu degun problem, no da pont de ududa finanziel y nianca per l frabiché” dij Laimer sorissan la mpurtanza de lecurdé la data a na maniera che i patrons dla frabiches sibe nfurmei per tëmp.
L auzé dl livel minimum à nce cunseguënzes sun l bonus de cubatura. Nchinamò giapoven per n livel plu aut permez al minimum, cësa tlima B mpede me cësa tlima C, n bonus de 5% de cubatura sëuraprò. Per na cësa tlima A nchinamei 10% de cubatura sëuraprò. „Sce l livel cësa tlima B devënta norma, toma sambën demez l bonus de cubatura per chësc livel. Per la cësa tlima A ne saral deguna mudazions n cont de bonus.
Duta la regulamentazion nueva ne reverda nia l ressanamënt energetich de cëses bele frabichedes. Sce l vën fat n ressanamënt a na maniera da arjonjer l livel cësa tlima C, possel unì frabicà 200 metri cubich de plu.
as
