Atualità
Prim muciadives tla vedla caserma Gorio a Bulsan
USP – I prim muciadives dal’Africa dl nord che ruverà tl Südtirol giaperà da albierch tla vedla caserma Gorio ti plans de Bulsan. Chësc ie unì udù dant dala Jonta provinziela te si senteda (da NCUEI) ai 11 de auril. Sce l ëssa da unì do mo de plu jënt, uniral nuzà nce d’autra casermes uetes.
Per ti unì ncontra ala gran cumpëida de muciadives nordafricans che ie ruvei sun la costes talianes, à l Guviern a Roma dat ora la puscibltà de n lizënza de sujurnanza per mez ann. Cun chësta lizënza a tëmp puderà i muciadives, aldò dla Talia, arjonjer nce d’autri paejes.
La Jonta provinziela à tëut prim pruvedimënc sun la basa dla tratatives danter Stat y regions per spartì su i muciadives sun dut l raion naziunel y per ti pité albierch y da maië tres l servisc de prutezion zevila. Chësta persones unirà spartides su n relazion ala populazion dla regions. Tla provinzia de Bulsan viv 1% dla populazion naziunela, nsci fejen cont cun feter trënta muciadives. “On njenià n program per tò su chësta persones che vëja dant de plu casermes uetes ulache pudon ti dé da albierch” à dit Durnwalder. Davia che l ie rie da lauré cun tendes ne an nia ulù tò n cunsciderazion chësta puscibltà. L prima luegia che unirà metù a desposizion ie la vedla caserma Gorio tl plans de Bulsan.
“Speron che la prima previjions dl Guviern che rujenova de 55.000 persones ne sibe ntant, cun i pruvedimënc dl stat, nia plu realistiches” à dit Durnwalder rujenan nce de emergënza a livel europeich. “La Union europea ne possa nia lascé la Talia dassëula, a chësc problem muessen ti jì permez cun solidarietà a livel europeich”.
as
