Atualità
Dis de educazion politica: manifestazions per scoles
USP – Proscimamënter scumëncia di dis de educazion politica 2011. Dlongia manifestazions daviertes a duc, à la repartizion per la furmazion nce njenià ativiteies per la scoles. Davia che la cumpëida ie limiteda dëssa maestri nteressei se nunzië per tëmp.
Per tlasses dala terza mesana suvier iel unì mparà ite l pez de teater sun l’eutanasia dal titul "Spuren der Seele". Chësc pez trata dl mazé de andicapei tl tëmp dl Nazionalsozialism. L teater vën purtà dant tl teater de Gries a Bulsan cun la prima reprejentazion ai 16 de auril. La chertes per sculeies costa sies euro. Nteressei possa se nunzië nchin ai 14 de auril pra Paola Guerra y Alexandra Hofer (Tel. 347 7131789 o 338 4700783, paolagrr@libero.it, www.theatraki.org).
Ala scoles autes vëniel pità l film da chino sun la costituzion y politica taliana dal titul “Niente paura” cun l ciantarin rock Ligabue. Chësc film trata articuli dla costituzion n referimënt ai ultimi tëmps, tl cuntrast dla cianties de Ligabue. Nfurmazions de carater didatich sun chësc film iel nce da abiné sun la plates internet dl Istitut Pedagogich y dl Filmclub de Bulsan, o les damandant al adres walter.pichler@schule.suedtirol.it. La reprejentazions dl film sun la costituzions ie prugramedes ai 3, 4, 5 y 6 de mei tl Capitol-chino a Bulsan. La cherta de ntreda costa cater euro per sculé. Per la reprejentazions possen se nunzië nchin ai 29 de auril pra Maruska Bertolini, tel. 0471 974295, info@filmclub.it.
Films y libri sun l argumënt dla respunsabltà, tema zentrel dl’azion da chëst ann, ie nce tl cufer di media. L material ie adatà per tlasses dla scoles mesanes y scoles autes. Chësc cufer di media ie nce a desposizion do i dis de azion tl Departimënt educazion y cultura ladina pra Erna Flöss (tel. 0471 417034, erna.floess@provinz.bz.it).
as
