Atualità
Lecort per la vitimes dla Venuesta n ann do la desgrazia dla ferata
USP - Ai 12 de auril dala 09.01, avisa n ann do la desgrazia tragica dla ferata dla Venuesta danter Kastelbell y Latsch iel ncuei unì descurì n sas de lecord ala nuef vitimes. “On udù cosses che ne an dant mo mei udù y che ne desminceron mei” à dit l presidënt dla provinzia che à nce lecurdà dl gran mpëni dla scuadres de prim aiut.
“L 12 de auril, n lunesc d’ansciuda, fova n di sciche d’autri nchin che ne ie nia ruveda la nutizia dla desgrazia dla ferata dla Venuesta” à dit Durnwalder pra al festa de lecord sun la luegia de desgrazia dan a feter duta la Jonta provinziela, reprejentanc di chemuns, dla scuadres de prim aiut y dl orden publich, ma dantaldut di parënc y cumpanies dla vitimes dla desgrazia.
Do la nutizia tragica ne nia plu sciche l fova dant, dantaprima per i parënc dla vitimes. “N chël di da duman à nuef persones saludà per l ultimo iede i siei de familia” à dit l presidënt dla provinzia dan al sas ulache n possa liejer i inuemes de Franz Hohenegger, Regina Tscholl Tappeiner, Franz Rieger, Rosina Ofner, Michaela Zöschg, Julian Hartmann, Elisabeth Peer, Judith Tappeiner y Michaela Kuenz Oberhofer.
Cie che fova da udëi sun la luegia dla desgrazia nes resta tl lecort. “Udù ons nce coche trueps à judà, zënza cialé a se nstës y zënza paussé”, nsci à Durnwalder rengrazià duc chëi che se à dat ca per judé.
Ntan chësc ann do la desgrazia an cialà de judé mo inant, dut cie che se lascia. “Pudon me judé a livel materiel y mustré nosta solidarietà, de plu ne pudons danz nia fé” à dit l presidënt dla provinzia. Cialan de reviers ne ëssa deguni pudù udëi danora la desgrazia dla ferata dla Venuesta. “Vivon te n raion da mont, y l risich ne possa nia unì astilà ora defin. Nëus pudon me fé dut chël che la persona possa fé, per smëndrì l risich” à dit Durnwalder.
as
