Atualità
Cuncors y custimënt per l servisc de prim aiut cun l joler
USP – Do che la ncëria per l servisc de prim aiut cun l joler ie bele unida slungëda plu iedesc unirala scrita ora da nuef. Te si tlausura à la Jonta provinziela udù dant n servisc cun la doi sëntes a Bulsan y Persenon ntan dut l ann. Ntan la sajons turistiches uniral pità mo n terzo servisc cun sënta te Gherdëina.
L servisc de prim aiut cun l joler dëssa unì mantenì y unì spartì su danter trëi joleri ntan la sajon y doi mascins ora de sajon. La situazion ne possa nia unì paredleda cun l Tirol dl Nord y dl Ost ulache l ie 14 joleri, ajache iló muessa i pazienc paië scialdi de plu. Te si tlausura à la Jonta provinziela (NCUEI) ai 22 de auril, tratà la partezipazion da pert di pazienc per curì l custimënt dl servisc.
Tl Südtirol ie unì fat passa 2700 ntervënc cun l joler, julan de ndut feter 59.000 menuc. “L ne ie nia plu mesun jì inant nscila che duc vën menei cun l joler zënza che i ne juda a paië l custimënt. Chësc reveda dantaldut la jënt da demez” à dit l presidënt Durnwalder, do la tlausura dla Jonta provinziela. L ann passà à la Provinzia de Bulsan dat ora 6 milion de euro per l servisc cun l joler, me 3 milion ie unì paià de reviers.
Nchinamò fovel udù dant che per n ntervënt cun l joler, muessa l pazient da oradecà paië 86 euro al menut. “Chësc cuntribut dëssa unì auzà a 100 euro” à dit l presidënt dla Provinzia. Per la jënt da tlo fovel nchinamò udù dant n ticket de 100 euro. Nce chësc dëssa unì auzà. I assessëures provinziei traterà cun i partner soziei per ruvé a n aumënt realistich. “Truep zitadins ie curì da na assegurazion, chëstes dëssa sëurantò plu de 100 euro per ntervënt” à dit Durnwalder.
as
