Atualità
Jonta provinziela sun l cialé di documënc dla SEL
USP – Per la Jonta provinziela ne iel nia da pesimé n cont dl pudëi cialé ai cuntrac dla SEL cun ENEL y Edison. “L ie na sentënza dl Cunsëi de Stat a chëla che tramedoi pertes muessa se tenì” dij la Jonta provinziela. Chësc uel di che la SEl muessa ti lascé udëi i cuntrac ai cunselieres di Vërc, ma ëi ne possa nia purté i cuntenuc al publich.
La Jonta provinziela sorissea danora de ne vester nia la pert che à i cuntrac dla SEL da lascé udëi. L ne ie nia unì tëut su de bon uedl co che se à cumpurtà i cunselieres te chëla che cunedì tres i media che n se prejenterà n merdi per se damandé de udëi i cuntrac. Aldò di assessëures provinziei ëssen nce pudù la mëter a jì autramënter, fajan ora n terminn deberieda cun la SEL per udëi i papieresc, co che l vën zënza ënghe fat.
Per la Jonta provinziela iel tler che l ie da se tenì ala sentënza dla suneria, te chëla che la va n drova. Tl cajo di cuntrac dla SEL uel chësc di che la SEL muessa i lascé udëi ai cunselieres che à damandà. “I Vërc abinerà ti cuntrac é me chël che ti ie bele unì prejentà tl Cunsëi provinziel” vëniel dit da pert dla Jonta provinziela.
L ie nce da lecurdé che la sentënza vëija dant na ublianza per chëi che puderà udëi i cuntrac, chëla dla cunfidenzialità. “Nce chësta ublianza ie pert dla sentënza y perchël unfat da respeté” dij la Jonta n referimënt ala cunedida da pert di cunselieres de ulëi fé al savëi nfurmazions ora di cuntrac. “L muessa vester tler che na tel cunedida ne porta nia bon sanch y che nce te chësc cajo à la suneria metù dant la ublianza cunfidenziela sun cuestions strategiches da pont de ududa economich” vëniel dit da pert dla Jonta provinziela che spera che la SEL y i Vërc sibe prësc boni de se mëter a una.
as
