Atualità
La Jonta provinziela lascia adaté l proiet “Info TV”
USP – Cun n canal de televijion uelen dé nfurmazion turistica ala jënt che vën tl Südtirol a na maniera moderna. La Jonta provinziela à (ncuei) ai 2 de mei tratà la prupostes y à fat ora de lascé adaté l proiet y l custimënt.
Canche l turist ruva te si majon, dëssel giapé prejentà l raion dl Südtirol cun si vela de ativiteies, servijes y lueges da jì a cialé ntan la feries tres l canal de televijion. “Son dla minonga che l dëssa unì mustrà films drët curc y pità nfurmazion tres n sistem teletext” à dit l presidënt Durnwalder do la senteda dla Jonta.
Cun l mudé sun l sistem de trasmiscion televisiva digitela iel unì udù dant n canal per na televijion turistica. “La trëi prupostes sun mëisa ne à nia arjont la cunvinzion di assessëures y nce l custimënt ie massa aut” à dit l presidënt dla Provinzia. Nsci iel unì fat ora che l program y l custimënt dëssa unì adatà a na maniera che la Jonta provinziela posse tò na dezijion sun l “info TV” per l Südtirol.
as
