Atualità
Roma azetea l’Euregio sciche istituzion – lëtra a Durnwalder
L’Euregio Tirol-Südtirol-Trentino sciche cunlianza teritoriela possa deventé istituzion. Ai 3 de mei (NCUEI) à l presidënt dla Provinzia de Bulsan giapà la comunicazion dala Presidënza di Ministri a Roma che l possa unì metù su l’Euregio sciche grupa europea de culaburazion teritoriela (EVTZ: Europäischer Verbund territorialer Zusammenarbeit).
“Per chësc mumënt ons laurà giut”, nsci ie stata la prima reazion dl presidënt Durnwalder do che l à giapà la lëtra dal secreter de stat Gianni Letta ulache l vën fat al savëi che l Guviern Talian lascia pro la furmazion dla grupa EVTZ. Do tratatives longes y ntensives possel śën unì metù su la basa giuridica per na culaburazion mo plu strënta danter la trëi provinzies che possa se tlamé ufizialmënter, cun l bënsté da Roma, "Euregio Tirol-Südtirol-Trentino".
La grupa EVTZ (Europäischer Verbund territorialer Zusammenarbeit) ie ududa dant dala Union Europea sciche forma de culaburazion de raions a n lievel istituzionel plu aut.
Bele de utober ova la provinzies de Bulsan y Trënt mandà na pruposta de statut a Roma per giapé l bënsté a na culaburazion sëura la sëides de Stat. Da pert de Roma fovel mo unì damandà de stlarì vel ponc, la resposta ie unida mandeda a mez fauré.
“Do che l ie unì azetà de mëter su la grupa se tratela de fé ti proscimi sies mënsc la fundazion dan a nutar y de mëter su i organns aldò dl statut” spiega l presidënt dla Provinzia. Daldò vala de lascé de pro l program de lëur. “Śën che la Euregio devënta na istituzion ulons prësc ti dé cuntenuc y la fé deventé na realtà nce per la jënt” dij Durnwalder.
as
