Atualità
N dumënia ai 15 de mei, di nternaziunel di museums
USP – 45 museums y abinedes tën n dumënia che vën, ai 15 de mei l di nternaziunel di museums. Gran pert pieta la ntreda debant y na vela de ativiteies. Danter i truep museums che tën pea chësc di nternaziunel iel nce l Museum Ladin y l Museum de Gherdëina.
L cunsëi nternaziunel di museums ICOM numinea l di nternaziunel di museum for de mei. Tl Südtirol uniral chëst ann tenì ai 15 de mei canche l ie nce l di dla families. “Cun la vela de museums che pieta la portes daviertes ulons nvië la jënt da tlo y la families a ti cialé ala gran varietà de museums” dij l assessëura Kasslatter Mur.
Al museum sciche nosta lecurdanza ie dedicà l di nternaziunel da chëst ann. Ti museum possen mparé a cunëscer coche vivova nosc nëinesc y nce la generazions che vën do possa se rënder cont coche fova la cundizions de vita te nosc raion fova da vedlamënter.
Tl Museum Ladin Ciastel de Tor vëniel n dumënia pità n program speziel cun juesc y aurela curta per mëndri metù a jì deberieda cun la lia Arteviva. Chësta ativiteies vën pitedes dala 10.30 nchin la 17.30. Dala doi domesdì puderà i vijitadëures dl Museum Ladin fé pea n quiz metù a jì dai paures jëuni da S.Martin.
L Museum de Gherdëina dedicheda l di nternaziunel dl museum ai vedli luesc da paur. N ucajion dla publicazion dla cherta di mejes puderan jì a ti cialé a vedli mejes cumpaniei da esperc. Dala 10 danmesdì uniral muet dan l Museum de Gherdëina per jì a ti cialé ai luesc da Frëina, Stlejuc, Milan y Martin a Urtijëi. Dala doi domesdì vëniel muet a S.Cristina, da Aldoss sun Plesdinaz, per vijité i luesc Crëpa, Paratoni y Insom. Dala doi ala 6 domesdì uniral tl museum nce pità juesc per families cun n quiz. La bibliotech ladina pieta libri sun l’architetura da paur tla valedes ladines.
Duta la nfurmazions sun i 45 museum che fej pea l di nternaziunel di museums cun i programs dl di ie da pudëi cialé do sun la plata web www.museumstag.info y tl cudejel dat ora per chësta ucajion.
as
