Atualità
La Jonta provinziela uel majera culaburazion danter Eurac y Università
USP – Per arjonjer na majera culaburazion danter l’Academia europieca EURAC y l’Università de Bulsan à la Jonta provinziela numinà vel reprejentanc che per tramedoi cunsëies de aministrazion. Werner Stuflesser de Urtijëi dëssa resté presidënt dl’Eurac.
L’Academia europeica EURAC fova unida metuda su cun l fin de anjenië la streda per mëter su na università a Bulsan. “Śën che on na università iel debujën de plu culaburazion danter la doi istituzions y n pert nce de astilé ora lëures dopli” à dit Luis Durnwalder (ncuei) ai 16 de mei do la senteda dla Jonta provinziela. Per arjonjer n pensé da partner à la Jonta provinziela nuzà la nomina dl cunsëi de aministrazion nuef per se lascé n pert reprejenté dala medema persones sciche tl cunsëi dl’università. L ncëria da presidënt dëssa resté a Werner Stuflesser de Urtijëi. Da pert dla Provinzia iel mplu unì numinà Manuela Nocker de Urtijëi (cunseliera de Università), Karin Dalla Torre (diretëura dla Repartizion per cultura tudëscia) y Andrea Zeppa (diretëur dla Repartizion per inuvazion). Autri trëi cunselieres unirà litei pra la reunion generela. La Jonta provinziela à fat la pruposta de Konrad Bergmeister (presidënt dl’Università), Pietro Borgo (vizepresidënt dl’Università) y Siegfried Rinner (reprejentant dl’economia).
La Jonta provinziela se damanda mudamënc al statut dl’Eurac n cont dla spartizion dla ujes. “La Provinzia paia ite 750.000 euro de cuntribuc, perchël fossel nce drët adaté la relazions dla ujes” à dit l presidënt dla Provinzia, se damandan feter mesa la ujes. I assessëures provinziei se damanda nce che Eurac y Università mëter adum vel ciamps de aministrazion sciche per ejëmpl l ufize de avocatura y l ufize per l personal.
as
