Atualità
Jonta provinziela azetea de cumpré 8 ferates nueves
USP – Per l trasport publich dëssel unì cumprà 8 ferates nueves. La Jonta provinziela à (ncuei) te si senteda dl 23 de mei dat pro l nvestimënt che dëssa unì curì cun l sparani dl fit per de vedla ferates.
L custimënt de 8 ferates cun 6-7 vagons ie de 59 milion de euro. Te 11-12 ani dëssa chësc unì curì cun l sparani dl fit che ie nchin śën unì paià a Trenitalia. “Te chësc mumënt paions n fit de 13,5 euro al chilometer, sce on ntës la ferates ruvons ju a 9,8 euro al chilometer che fej ora n sparani de feter 5,8 milion de euro al ann” à dit l presidënt Durnwalder do la senteda dla Jonta. Sun la basa de chësc cont à la Jonta provinziela dat l’autorisazion ala sozietà per strutures de trasport STA de cumpré la ferates nueves. A chësta maniera puderà la populazion tosc viagë sun ferates nueves.
Per la ferata dla Venuesta ne uniral per ntant nia fat n sistem a strom. La Jonta provinziela à valutà l nvestimënt de 51 milion de euro massa cëre. Chësta dezijion ie nce unida tëuta cunscidran che da permò fovel unì cumprà locomotives a diesel. “Nchin a Maran furnea la ferates a strom y dant o do iel dessegur debujën de pudëi furné inant tla Venuesta cun l medemo sistem, ma ntant dëssel unì nuzà l sistem che ie bele” à spiegà l Presidënt dla Provinzia.
L custimënt di trasporc dëssa unì smendrì. La Jonta provinziela fé conta che n auter ann uniral spendù 15 milion de manco, mpede 210 milion de euro messeran prugramé de avëi me plu 195 milion a desposizion.
as
