Atualità
Program per smendrì l aspité ti spediei dat pro dala Jonta provinziela
USP – Tenian cont di urientamënc bele dai pro, à la Jonta provinziela (ncuei) ai 23 de mei azetà l program per smendrì l aspité per prestazions spezialistiches. N se à tëut dant che i pazienc dëssa aspité al plu nchin a 60 dis per caji che se lascia spusté y te ezezions nchina 120 dis.
La prenutazions per tratamënc tl ciamp saniter publich vën fates aldò dla prëscia tlinica, spartida te cater categuries: de prëscia (tratamënc nchin te 24 ëura dala dumanda dl dutor), curt tëmp (nchin te 8 dis), che se lascia spusté (nchin 60 dis, 120 te ezezions) y caji che n se lascia prugramé (data fata ora dal spezialist cun l dutor de cësa). Per vijites o ntervënc de prëscia y da fé te curt tëmp ne iel nia gran dificulteies cun l aspité. La cuestion ie plu problematica ti caji ulache se lascia spusté (vijites de prevenzion, vijites de cuntrol, detlarazions dl spezialist) ulache l ie da aspité de plu che udù dant.
La Jonta provinziela ova de auril dat pro de plu pruvedimënc, che ie śën unic formalisei te n program per smëndrì l aspité. Aldò dla diretives vëniel ti zëntri de prenutazion me fat ora na data per la prima vijites, sce l ie debujën de mo d’autra vijites, ie l spezialist che mët nstës na data aldò de regules. Sce l ne nia mesun abiné na data ti tëmps udui dant, possa l pazient unì mandà te n auter spedel provinziel ulache l ie manco da aspité. “La sauridanza de na sëula unità sanitera ie propi che se lascia coordiné miec danter i spediei” à dit Durnwalder do la senteda dla Jonta.
Sce l ne ie nia mesun giapé na data per tëmp te n auter spedel, possel unì tëut n cunsciderazion prestazions externes. Chëstes possa unì pitedes dal dutor de spedel privatamënter ora de ëura, scenó te n spedel privat o scenó nce da spezialisć privac. L custimënt vën te chisc caji curì dala Unità sanitera.
as
