Atualità
La Jonta provinziela segurea che l ulenteres possa judé i dutores
USP – I ulenteres che fej servisc de prim aiut possa pité assistënza ai dutores, ma sciche i nfermieres ne possi nia tò nstësc dezijions n cont de traté i pazienc. La Jonta provinziela à (ncuei) ai 23 de mei segurà chësta regulamentazion che ie nce scrita sun la lëtra dl 2006 dl assessëur Richard Theiner.
La Jonta provinziela ne uel nia ti tò lidëza ai ulenteres y culaburadëures dependënc che fej prim aiut. “Savon dl valor dla persones che lëura tl prim aiut y ulon judé l ulentariat, y nia l saré ite” à dit l presidënt Durnwalder do la senteda dla Jonta. Nsci à la Jonta provinziela tëut posizion ala polemica sun l ciamp de ntervënt di culaburadëures dl prim aiut.
La Jonta provinziela à segurà che l scrit dl assessëur Theiner dl ann 2006 à na valuta tan giut che l ne vën nia tëut na dezijion a Roma. Nsci possa culaburadëures cun la furmazion aldò nce pité assistënza ai dutores de prim aiut. “I possa me fé chël che ti vën dit dal dutor, ma ne possa nia nstësc tò dezijions sun ntervënc de medejina” à sorissà Durnwalder.
as
