Atualità
Premià i „Kangaroo dla matematica“, miëur resultat per n sculé ladin
USP – 7.507 sculeies dala terza elementera nchin ala cuinta tlas dla scola auta à chëst ann fat pea l cuncors „Kangaroo dla matematica“ per la scoles de rujeneda tudëscia y ladina. Danter i sculeies dla terza tlasses mesanes à venciù Klaus Prinoth dla scola mesana de Urtijëi che à arjont l miëur resultat de duta la categuries. N merdi (ncuei) ai 24 de mei ie tl palaz Widmann a Bulsan unì premiei 55 sculeies.
Tl cuncors „Kangaroo dla matematica“ ne se tratela nia de premië i majeri talënc de fé conc, ma plu che auter de mutivé na gran cumpëida de sculeies per la materia ti pitan n’esperienza da cumpetizion ulache la va da se deriejer y abiné la soluzion. A livel de Europa à fat pea 4 milion de sculeies. Tla provinzia de Bulsan ie chësta cumpetizion unida meduta a jì per l sesto iede. I sculeies, mpartì te 11 categuries aldò dla tlasses de scola, à respundù a dumandes multiple choices y a messù abiné soluzions creatives a problems matematics.
Tla categuria dla terza tlasses mesanes à venciù Klaus Prinoth dla scola mesana de Urtijëi. Ël à arjont 131 ponc, che ie l miëur resultat de duta la categuries. Danter i premiei iel nce d’autri sculeies ladins che à fat pea sota l’inuem de scoles tudësces y talianes.
“L bon resultat per la scola ladina desmostra la bona cumpetënza de matematica y ie n sëni che la carateristica dla rujenedes ne ie nia l sëul pont de cualità dl sistem scolastich ladin” à sorissà l ntendënt Roland Verra pra la premiazion a Bulsan.
as
