Desvalì | 01.06.2011 | 10:05

Prejentà la cumpëida dla jënt ai respunsabli de istituzions ladines

USP – „La cumpëida dla jënt 2011 ie na ucajion per la jënt ladina de fé valëi si posizion, tenì adum y demustré si identità“ à dit l assessëur provinziel ladin Florian Mussner (n sëira) ai 31 de mei ntan l'ancunteda de nfurmazion y sensibilisazion sun la cumpëida dla jënt per ambolc y respunsabli dla istituzions ladines.

La detlarazion de grupa de rujeneda sarà de utober autramënter permez al ultimo iede, dan 10 ani. Chësta detlarazion possa unì fata te doi pertes. Chiche à debujën de na detlarazion persunela che vel nce per na stiera publica, possa la fé ntan dut l ann pra la suneria de Bulsan. La detlarazion anonima muessa unì data ju pra la  cumpëida dla jënt, de utober 2011. Chësta vel per la statistica y de cunseguënza per l pruporz, aldò de chël che tla Provinzia de Bulsan vëniel spartì la ressorses dla vita sozio-culturela. L pruporz ie una dla regules fundamenteles dl Statut de Autonomia per garantì la cunvivënza y che deguna grupa etnica ne ebe n svantaje. Aldò dl pruporz vëniel spartì la stieres publiches, i aiuc per cuatieres, finanziamënc per l’istruzion y la cultura danter la grupes etniches.

Dan 10 ani se ova 4,37% detlarà ladins, 26,47 % taliani y 69,15% tudësc. „Ntant ie l’autra grupes etniches cresciudes de cumpëida, cossa che ne ie nia unida a se l dé tla valedes ladines, nce ajache trueps ie jic a viver oradecà. Perchël ne saral nia saurì da arjonjer la medema proporzion permez al’autra grupes“ à dit l assessëur Mussner pra la prejentazion sun Jëuf de Frea.

I resultac dla cumpëida dla jënt ie dantaldut mpurtanc per la grupa etnica ladina ajache la ie la mëndra grupa. „La spartizion de stieres aldò dl pruporz ie n cont de proporzion. Tl cajo dla grupa ladina, cun 4,37% possa uni detlarazion fé defrënza“ à dit Alfred Aberer, diretëur dl ASTAT. “Tla spartizion de stieres, fej l 4,37% ora me na sëula stiera sun 23. Canche l ie manco stieres a desposizion, o n cunsëi cun manco cumëmbri, giapa i ladins me n reprejentant sce tla divijion vëniel ora n rest aldò.”

Nfurmazion y sensiblisazion per la detlarazion de grupa etnica unirà fata tres na campania, manifestazions y cun l aiut di media. Per uni familia y comuniteies ie unì njenià n cudejel de nfurmazion. Tres placac, la plata web www.sambegn-ladin.info y nserac ti media cialeran de arjonjer n pue’ duc i zitadins, nce chëi che ie jic a viver ora dla valedes ladines. De plu persones se à metù a desposizion per na testemunianza sëurantulan l slogan dla campania „sambën ladins“, ëi ie ejëmpli vives de identificazion ladina. Si testemunianzes vën cunedides sun placac, spot per radio y videos da udëi sun la plata web. Ala cumpëida dla jënt y la cunseguënzes sun l pruporz unirà d’autonn dedichedes uniteies didatiches tla scoles ladines, manifestazions de nfurmazions da pert dla lies y di chemuns. Nce l di dla Cultura Ladina ala fin de setëmber unirà chëst ann dedicà ala cumpëida dla jënt cun la detlarazion de grupa etnica.

Na gran cumpëida de respunsabli di chemuns, servijes de furmazion, Scola y Cultura ladina à tl’ancunteda sun Frea mustrà entusiasm per l mpëni dl Assessorat Ladin per la cumpëida dla jënt 2011. L assessëur Mussner à nvià a udëi la cumpëida sciche ucajion per la mëndra grupa etnica, „ulon demustré de vester na realtà che tën adum y che porta inant si identità ladina“.

I chemuns ladins ie partner dla campania de nfurmazion dl Assessorat Ladin. Da una pert sëurantol duc i chemuns duvieres dal ASTAT n cont de purté i formuleres tla families y de jì ai tò. „I chemuns possa nce dé n si sustëni a nfurmé la populazion sun la cumpëida dla jënt“ à dit Franz Complojer, ambolt da La Val.

Testimonials „Sambën ladinA“

Carolina Kostner, campionëssa de jadiné
Franz Comploj, digan dla facultà de Scienzes dl’Educazion
Irmengard Senoner, abata dl cunvënt Mariengarten
Marina Crazzolara, oma y mprenditëura
Walter Valentin, paur jëunn
Belsy, star dla mujiga populera
Max Castlunger, musizist percuscionist
Simon Kerer, arpizadëur
Manuela Mölgg, campiunëssa de schi
Luis Alfreider, stradin
Georg Kostner, artejan scultëur

Nfurmazions sun l sistem de cumpëida

Astat, telefonn 800 649 122 (numer vërt) www.provinz.bz.it/astat/de/themen/1127.asp

as

Galaria dales fotografies

Tenì adum per purté inant la identità ladina: l’ancunteda de nfurmazion sun la cumpëida dla jënt 2011;

Downloads