Atualità
Assessëur Mussner n cont di jëufs dla Dolomites
USP – “Per na pruposta de regulamenté l muvimënt di auti sun i jëufs dla Dolomites dëssa nce rujené pea la Lia di Chemuns ladins”, nscì l assessëur provinziel Florian Mussner do che la Jonta provinziela se à damandà na pruposta cuncreta dai chemuns dla val Badia y de Gherdëina.
Sce l muvimënt di auti sun i jëufs dëssa unì smendrì cun n daz, stlujan la streda a ëures o cun vel auter pruvedimënt, iel na cuestion che toca dantaprima la populazion che vif tl raion ladin. “I jëufs dla Dolomites reverda propi pue’ duc i chemuns ladins, perchël iel nce drët che la Lia di Chemuns ladins rejone pea a lauré ora na pruposta” dij l assessëur ladin Florian Mussner. La Lia di chemuns ladins ie metuda adum da 19 ambolc di chemuns tla cin valedes ntëur al Sela, val Badia, Gherdëina, Fascia, Fedom y Ampëz.
“Per la pert dla provinzia de Bulsan ie i jëufs sun raion di chemuns de Corvara y Sëlva, perchël iel nce drët che chisc chemuns ebe na funzion de coordinazion a lauré ora la pruposta” dij l assessëur ladin. Do che l ie unì rujenà a plu livei dla problematica dl gran muvimënt sun i jëufs, sorissea Mussner che l ie unì l mumënt de tò na dezijion.
N lunesc ai 06 de juni (inier) ova la Jonta provinziela de Bulsan tëut la dezijion de ti damandé ai chemuns dla val Badia y de Gherdëina na pruposta per regulamenté l muvimënt sun i jëufs. Chësta se aspieten nchin ala fin de chëst ann. Na regulamentazion dl muvimënt di auti sun i jëufs vën nce ududa tl cuntest de pruvedimënc per mantenì l recunescimënt dl Unesco sciche arpejon naturela mundiela. Do plu ani de descuscion sënt la Jonta provinziela śën l bujën de abiné na soluzion per smendrì l muvimënt sun i jëufs.
as
