Atualità
Nce sculeies ladins danter i premiei de scienzes natureles
USP – Danter i sculeies dla scoles autes dl Südtirol che à fat pea i campionac de scienzes natureles iel (NCUEI) ai 7 de juni unì premià 40 sculeies. Dla scoles autes ladines ie Milena Perathoner dl Istitut Tecnich de Urtijëi unida premieda tla olimpiada de conc.
Tl palaz Widmann a Bulsan à l assessëura Kasslatter Mur, deberieda cun i ntendënc Peter Höllrigl y Roland Verra pudù sëurandé uneranzes a sculeies che se à muserà de conc, nfurmatica, fisica y chimica. Per la scoles autes ladines iel unì premià Milena Perathoner dl Istitut Tecnich “Raetia” de Urtijëi. La sculea dla segonda tlas iel unida premieda deberieda cun d’autri sculeies che se à fat merit de conc tla categuria bienium. Te chësta categuria ova fat pea 307 studënc. Per Milena ie i tesć stai drët mpeniatives, cunscidran nce che i fova per talian y a scola vën chësta materia nsenieda per tudësch. Tla medema categuria iel nce unì premià Marco Pedevilla, sculé dla segonda tlas tl realgymansium de Burnech.
L assessëura Kasslatter Mur à pra la premiazion rujenà de campionac che sburdla sculeies che à talënc particuleres.
La olimpiades dla scoles ie partides te trëi pertes. N iede vëniel d’autonn fat na fasa a livel de scola, pona vëniel fat na cualificazion a livel provinziel o regiunel de auril y mei ulache i sculeies possa se cualifiché per i campionac nternaziunei. N gran nteres iel chëst ann unì mustrà pra i conc ulache de ndut à fat pea passa 700 sculeies.
Nfurmazions sun la olimpiades de scienzes natureles cun i duvieres ie nce da pudëi cialé do su l web al adresses http://olimpiadi.ing.unipi.it, http://www.olimpiadi-informatica.it y www.cadnet.marche.it/olifis/index.htm.
as
