Frabiché | 17.06.2011 | 17:40

Giaurì la zircunvalazion nueva de Vandoies

USP – La giaurida dla zircunvalazion nueva de Vandoies ie (NCUEI) ai 17 de juni stat n mumënt storich per la cumenanza dl luech tla valeda de Puster. Tres chëla che l muvimënt de auti ne passa nia plu tres l luech vëniel per i zitadins a se l dé plu segurëza sun streda, na miëur cualità de vita y pruspetives nueves de svilup. L presidënt dla Provinzia Durnwalder y assessëur Florian Mussner à ufizialmënter lascià passé i prim auti sun la streda nueva.

Cun l giaurì dla zircunvalazion a Vandoies ne se muda nia me la cundizions de vita per i zitadins dl luech, ma bën per duc chëi che furnea sun la streda de Puster. Da chësc pont de udùda à la strutura nueva nce n gran valor per arjonjer plu saurì y cun plu segurëza la val Badia. La streda nueva ie perchël de utl ala populazion y nce per l muvimënt turistich. „L toch de streda che on pudù giaurì ie na pert de n majer cunzet per ressolver l problem dla segurëza y dla streda mpifeda danter Burnech y l’autostreda“ à dit Florian Mussner.

L ngrandimënt dla streda a Vandoies ie stat debujën ajache l muvimënt ie dassënn cresciù per via dl turism y dl’economia n generel, ma nce per l transit pesoch tres Puster. De miëura stredes à nce na fazion sun l’economia locala ajache les ie de utl per pudëi tenì pea cun l marcià. „Iust per chësta rejon ne sentions tl Südtirol nia tan l che la jënt se n va dai raions da mont“ à dit Durnwalder pra la giaurida. Per avëi na mubilità che funziuneie ne vëniel nia mé fat nvestimënc te stredes ma nce tl miuramënt di culegamënc cun la ferata, à sorissà l presidënt dla Provinzia.

I culegamënc sciche la zircunvalazion de Vandoies ie una dla arjontes plu mpurtantes che l ie stat mesun arjonjer tres l’Autonomia. „Sun chësta nfrastrutures possa la jënt furné a lauré y furné a cësa cun plu segurëza, de cunseguënza ie nce la cumpëida de desgrazies caleda dassënn“ à dit l assessëur ai lëures publics. Avëi tëut demez l trafich dal luech de Vandoies uel di ti avëi tëut ju n pëis ala populazion, „Manco muvimënt de auti, manco pericul y perchël plu gheneda y cualità de vita per i zitadins“ à dit Florian Mussner.

Carateristiches tecniches
La zircunvalazion de Vandoies mesura 3,8 chilometri y scumëncia dala sarenera de Mühlbach y va nchin al raion „Lodenwelt“. Sun la prima pert ie la vedla streda unida splaneda y slargëda. Ulache la streda passa sota la scines dla ferata ora nchin ala „Lodenwelt“ iel unì fat na toch nuef de 1,8 chilometri. Chësta va n iede a pèr dla ferata, passa via la scines cun n sotpassaje de 54 metri y va pona inant dal’autra pert dla Rienz. La pert plu zitia da realisé ie propi l sotpassaje ulache l ie stat debujën de fé na vasca che tën l’ega, longia 480 metri y lergia 15 metri. Na particularità dla zircunvalazion ie nce l rone che ie unì fat a na maniera da tenì su la fuera. Tlo vëniel nce fat n mplant fotovoltaich tres chël che l sarà mesun fé na produzion de 100 kW/h de strom.
L custimënt de chësc toch dla zircunvalazion ie de 27,9 milion de euro. De viers de Vandoies de sëura uniral mo fat n toch de zircunvalazion. La proietazion de chësc segondo toch per astilé ora l luech de Vandoies de sëura dëssa unì fineda de autonn y pona uniral scrit ora i lëures.

as

Galaria dales fotografies

L assessëur ai lëures publics à ufizialmënter unì giaurì la zircunvalazion nueva a Vandoies de sot;