Ambiënt | 20.06.2011 | 16:13

Partì su 234 milion de euro per chemuns daujin ala zentreles dal strom

USP – La cunzescions dal ‘ega per la produzion de strom vëija nce dat nvestizions per l ambient. Feter 400 milion de euro dëssa te tëmp de 30 ani giapé i chemuns che vën tuchei dala zentreles dal strom. La Jonta provinziela à (NCUEI) ai 20 de juni partì 234 milion de euro a chemuns che fej pert de sies raions.

La cumpetënza sun la cunzescions dal’ega per la produzion de strom ie una dla arjontes plu mpurtantes dla Provinzia. L presidënt Durnwalder à do la senteda dla Jonta sorissà che la sozietà SEL à n davani de 50 nchin a 60 milion de euro al ann che va a bën di zitadins. Ma bele n cont de tarifes à la families vantajes y i chemuns giapa uni ann feter 11 milion dala produzion de strom. De chisc scioldi va 7 milion ai chemuns tuchei diretamënter y i autri 4 muessa mo unì spartì su. 

Na dezijion iel unida tëuta tla partizion di scioldi per pruvedimënc a bën dl ambient che paia chëi che à giapà la cunzescions. “Chisc 400 milion ne ans nchinamo nia y ne assan nce no zënza la cumpetënza sun l’ega da fé strom” à dit Durnwalder. La Jonta provinziela à spartì su de ndut 234 milion de euro per i chemuns de sies raions. Chisc unirà paiei ora te tëmp de 30 ani.

Dala zentrela de Kardaun uniral paià 103 milion de euro che vën spartì su danter Bulsan (24,91%), Renon (20,50%), Barbian (15,35%), Pruca (3,52%), Völs (10,55%), Karneid (20,53%) y Ciastel (4,54%).

Dal davani dla zentrela de Pruca iel udù dant 11 milion de euro per pruvedimënc ambientei. Chisc scioldi ie unic spartì su danter i chemuns de Pruca (37,34%), Barbian (0,87%), Laion (23,78%) y Ciastel (38,01%).

L’autra zentreles dal strom per chëles che l ie unì mpartì i paiamënc a chemuns ie chëla de Persenon (77 milion de euro), Sarenthein (18,5 milion de euro), Lappach (13,5 milion de euro) y Mühlwald (11,5 milion de euro).

I scioldi per pruvedimënc ambientei possa per doi terzi unic adurvei autonomamënter dai chemuns y un n terzo vën aministrei dala Provinzia. La prima rata dëssa aldò dl presidënt Durnwalder bele unì paieda ora de lugio.  

as