Atualità
Fibres otiches tl raion Salten-Scilier y nce a Urtijëi
USP – 13 lëures y nvestizions per 3,4 milion de euro cumporta l rë de fibres otiches che unirà fates tl raion Salten-Scilier. „L ie n gran custimënt, ma i vantajes per l raion ie mo majeri“ dij l assessëur provinziel Florian Mussner cunscidran che raions zënza internet slune ne puderà tosc nia plu tenì l var sun l marcià. Un de chisc lëures vën nce fat a Urtijëi.
Tl Südtirol iel bele na gran cumpëida de luesc ulache n possa se taché ite al internet slune sun banda lergia, na situazion che ne ie zënza nia data ti luesc da mont. Chësc culegamënt vën te de plu luesc mo pità via ondes radio che ne va nia tan bën y che vën cundiziunà dala situazions meteologica. Per chësta rejon se à la Jonta provinziela tëut dant nchin l 2013 de taché ite duc i chemuns ala rë de fibres otiches. „La fibres otiches se desferenzieia da d’autra tecnologies ajache les garantësc de bon culegamënc, ie lesieres, se lascia storjer y ne se lascia nia cundizioné da dedora“ spiega Mussner. La sëul svantaje ie che l mëter ju de chisc cabli ie mpeniatif y cëre. Puremò lascia la Jonta provinziela fé i culegamënc dala linies prinzipeles tla gran valedes ala valedes da na pert ora, nchin ti luesc. Daldò possel unì tacà ite cëses de chemun, zëntri de sanità, scoles, ufizies raionei, servijes de prim aiut, cëses cultureles, biblioteches y stazions de spartizion.
N majer program de lëures iel unì udù dant per l raion Salten-Scilier. Dantaprima muessel unì anjenià la roles uetes y pona te n segondo lëur unirà trat tres i cabli. La preparazion ie danterauter bele unida fata danter Sëuc y Ciastel (271.000 euro), da Völs a Sëuc iesen nchin de agost tl lëur de fé i lëures (654.000 euro). De lugio iel udù dant te tré ite i cabli de fibra otica danter l’autostreda y Ciastel (144.000 euro). Danter Runcadic y Urtijëi iel udù dant de mëter ju culegamënc nueves per n custimënt de 165.000 euro. Tlo uniral nuzà l ucajion che l vën mpò giavà su per fé la streda dala rodes dal raion artejanel, do ruf ite.
as
