Atualità
De gragn investimënc por l’internet asvelt tla Val Badia
USP – Cina dl 2013 dess düc i comuns dl Südtirol ester colià a internet tres fires otiches a na manira da garantì coliamënc plü asvelc. Chësc é ci che la la Junta provinziala s’à tut dant por mantignì la competitivité dl Südtirol sön le marcé. Na majera pert de chisc laûrs vëgn fata por la popolaziun dla Val Badia, olache al vëgn investì feter 3.611.000 euro.
I coliamënć internet a banda leria à bele arjunt gran pert dl raiun provinzial; śëgn fej la Junta provinziala le proscimo vare y sleria fora la rëi de fires otiches. „Les fires otiches é defin mius co i coliamënć tres ones radio, ares é plü lisires, ares se lascia storje plü saurì y ne vëgn nia condizionades da defora, implü garantësceres na miù capazité de coliamënt“ spliga l’assessur Florian Mussner. L’assessur recorda dal’atra pert, che mëte jö cabli de fires otiches é dër cër. Porimpò lascia la Junta provinziala fà i coliamënć dales linies prinzipales tles gran valades ales valades laterales, ćina ti paîsc. Dedô pol gnì colié ćiases de comun, zëntri de sanité, scores, ofizi raionai, sorvisc de pröm aiüt, ćiases culturales, biblioteches y repetidus .
Tla Val Badia vëgnel fat na majera pert di laûrs por colié i comuns ala rëi de fires otiches. Chisc dis vëgnel scrit fora de plü laûrs por mëte jö i ros olache an podarà spo trà tres i cabli de fira otica. Pro le tòch danter San Laurënz y Longega él odü danfora n laûr de 871.000 euro, da Longega a Al Plan n laûr de 481.000 euro y da Longega a La Ila un da 1,72 miliuns de euro.
Cater laûrs che reverda la Val Badia vëgn te chësc momënt proietà tl Ofize provinzial Infrastrotöres. Ara se trata di coliamënć da Picolin a San Martin de Tor de feter 150.000 euro, le trà tres i cabli de fira otica da San Laurënz a Longega por 150.000 euro y da Longega a Al Plan por 55.000 euro. Laprò vëgnel ćiamò la rëi de coliamënć por le raiun de produziun a San Laurënz por n costimënt de 184.000 euro.
as
