Atualità
Bulsan y Trënt deberieda n cont de stabilità y autostreda
USP – L judé pea al Stat talian per la stabilità finanziera y la cunzescion dl autostreda dl Prëner ie (ncuei) ai 11 de lugio stai argumënc dl’ancunteda danter i presidënc dla provinzies de Bulsan y Trënt, Luis Durnwalder cun Lorenzo Dellai.
La manovra fischela dla Stat Talian costa n gran mpëni a chël che nce la doi provinzies autonomes juderà pea. Chësc ie aldò de Luis Durnwalder bele unì udù dant tl’Acurdanza de Milan, che à valuta y che ne ie nchinamò nia unì atacà. Sibe Trënt che Bulsan ti tol ju al Stat custimënc per na miliarda de euro, 500 milion per Provinzia. “Tenian cont di scioldi che on mo da giapé da Roma, sparania l Stat mo for 150 milion de euro, y chisc muessa basté. De chësta minonga ie nce Dellai”.
L’Acurdanza de Milan reverda dantaprima la ntredes dla Provinzia. L Stat uel che la regions autonomes ne debe nce nia ora scioldi. Chësc ne ie per Durnwalder y Dellai nia da azeté. “Da una pert ne ie l’acurdanza mo nia unida fata cun la regions autonomes dla Sizilia y Sardegna, dal’autra pert ne possa Roma nia se sfurzé a no spënder scioldi dl bilanz. Sce ne on nia debic ne pudons nce no i paië ju”.
I doi presidënc dla provinzia se à metù a una sun si posizion de viers dla manovres dl Stat y uel ntervenì deberieda a Roma.
Deberieda uel Dellai y Durnwalder nce purté inant la cuestion dla cunzescion per l’autostreda. Aldò de na mudazion de lege dëssel deventé puscibl trasfurmé la sozietà dl’Autostreda dl Prëner te na sozietà nueva in house ulache l fej me pert aministrazions publiches che ie bele leprò. La sozietà nueva, newco, dëssa sëurantò la medema perzentueles de spartizion sciche les ie śën tla sozietà tl’Autostreda dl Prëner. La sozietà nueva muessa paië ite 580 milion al minister de cumpetënza y mo na soma al ANAS sciche na sort de fit. Sëuraprò muessel nce unì paià na soma ai chemuns tuchei dal’autostreda. La sozietà che fej la gestion dl’autostreda dl Prëner, dëssa aldò de Durnwalder nce judé pea al finanziamënt dl tunel dl Prëner per la ferata. I presidënc dla doi Provinzies ie stai a una sun la pruzedures per pudëi se tenì la cunzescion dl’autostreda, a cundizion che n ne muessa te chësc cajo nia tenì ite la normes dl pat de stabilità.
as
