Atualità

Sanité / Sozial | 13.07.2011 | 14:07

Cunsulënza debant sun la detlarazion de avëi: acurdanza cun patronac

USP – Per unifiché i sistemes, i muré y i rënder plu scëmpli uniral cun l prim de setëmber scumencià cun la detlarazion unificheda de davani y avëi. Scumencià uniral cun l ciamp soziel y saniter: per damandé na prestazion tlecheral me plu de jù na sëula detlarazion anuela. Per ti judé ai zitadins tl scrì ora chësta detlarazion unificheda, à l assessëur Richard Theiner (ncuei) ai 13 de lugio sotscrì na cunvenzion cun i patronac y i CAAF.

Cun la nueva detlarazion unificheda de davani y avëi (Einheitliche Einkommens- und Vermögenserklärung EEVE / Dichiarazione Unificata di Reddito e Patrimonio DURP) unificheia la Provinzia i sistems de valutazion per rënder la dumandes plu scëmples y dut l sistem plu efizient. L ne sarà nia plu debujën de pruzedures aministratives spezieles y paraleles, per chësta rejon ne muessa i zitadins nia plu prejenté na detlarazion te uni ciamp. L sistem de tò su la nfurmazions sun davani y avëi a na maniera de pudëi lascé pro servijes provinziei unirà scemplificà tres n formuler y na sëula banca dac. „L zitadin che damanda de pudëi se nuzé de servijes speziei muessa me plu de jù na sëula detlarazion anuela, che unirà pona tëuta n cunsciderazion da de plu ciamps de servisc aldò dla dumandes mandedes ite“ spiega l assessëur Richard Theiner.

La nuvità jirà n drova cun l prim de setëmber ti servijes soziei y saniteres. Dan damandé na prestazion spezifica o n cuntribut messeral unì da jù la detlarazion unificheda. Chësta possa nce unì data ju deberieda cun la prima dumanda o canche n fej la detlarazion dl avëi al Stat.

La nueva detlarazion unificheda possa unì data jù zënza paiamënt tla purtines di servijes soziei y saniteres, ma nce ti patronac o pra i servijes de assistënza fischela (caaf) di sindacac, assoziazions economiches y d’autra urganisazions ulache n possa dé jù dumandes per prestazions. „L servisc de cunsulënza per scrì ora la detlarazion nueva unirà pità debant“ sorissea l assessëur Theiner che à sotscrì na cunvenzion cun i patronac y i caaf per udëi dant duvieres y paiamënc da pert dla Provinzia. Per uni detlarazion scrita ora giapa i patronac 15 euro. Ala Provinzia ti cunvëniel dé ora chësc servisc de cunsulënza: „L’Aministrazion publica ne muessa nia se cruzië diretamënter dl tò su i dac y di mandé inant sun vies eletroniches. Ala purtines publiches ti toma demez chësc lëur a na maniera da pudëi se dediché a d’autri servijes per i zitadins“ spiega Theiner.

Per nfurmazions plu a puntin possen se ëujer ai patronac y ai servijes caaf. Nfurmazion y la lista di servijes ie nce publichedes sun la plates web dla Repartizion provinziela per l Soziel y Familia (www.provincia.bz.it/politiche-sociali) y sun la plates dla Jonta provinziela (www.provincia.bz.it/giunta-provinciale).

as

Galaria dales fotografies